الرسالة الرابعة - حيث أن.. لما كان

جدو ختيار:
أحلى و أطيب أنكل و ديدو في دنيتي :
حماي اللذيذ السكرة.. المارون جلاسيه :

أقلك جدو.. و لا كده بأكبرك؟ طب ما حضرتك طول عمرك هتفضل مكانتك في قلبنا كبيرة جداً.

على فكرة.. أنا مفهمة محمود إن حضرتك اسمك "بابا ديدو ختيار " علشان نشعر أننا بناديك بإسم ما اتندتش بي من حد قبلنا.. و بعدين شوف بقه فرحتك حتبقى ايه عند ذهابه للمدرسة و يقول: أنا إسمي" محمود ختيار "

بجد وحشني .. أما أشوفك .. طبعاً حضرتك عايش عصرك الذهبي من غيرنا.. و مش لاقي حد يغلس عليك بعد لما سافرنا.. اصبر علينا.. جاينلك .. و هنقعد نجري وراك- أنا والأولاد- لغاية ما تستخبى منا في الأوضة.. و تقفل على نفسك و إذا وقعت في إيدنا ..لن نرحمك!

شوف بص أما اقلك.. نفسي تقرأ رسالتي .. أنا عارفة انك مش حمل رغي و كمان مش من هواة الكمبيوتر و النت .. بس عشان خاطري.
هو ايه اللي عشان خاطري.. هو أنا حأتحايل عليك واقعد أريق ماء وجهي زي ما بتعمل فيا لما اتحايل عليك عشان تيجي تزورنا في الدوحة ؟
-ابداً - طب د أنا قلت أكتبلك.. لحسن تزعل مني و تقول في نفسك: هي ليه طول عمرها ما بتعبتليش وعمالة تراسل حماتها و تنسى حماها .. يعني شوف هأعملهالك جميلة.. و بعدين أنا عايزة حضرتك تسمع كلامي أقولك يمين يبقى يمين .. شمال يبقى شمال.. تيجي قطر.. تقوللي حاضر .. ماذا و إلا.. أقسي قلب محمود و دانة على حضرتك.. و بعدين أنا مش عارفة حضرتك معصلج كده ليه.. طب أقول إيه للناس في المجتمعات .. اقول لهم مش عارفة أمشي حمايا.. طب يرضيك كده..

شوف مامي و تانت أصبحوا سلسين ازاي " و ما بيبمبكوش معايا" من ساعة ما حذرتهم من أني سأستخدم "كارت الأحفاد " لو ما سمعوش الكلام .. و مامي وتانت ما بيمانعوش لما اقلهم يجوا يزورونا في قطر.. أمال ليه حضرتك مش راضي تنصاع لطلباتي .
الله.. الواحد مش هيعرف يمشى حماه على مزاجه اليومين دول,, أيه الخيبة بتاعتي دي.
J
ما تستغربش إني قلت اكتب لحضرتك .. ما أنا قلت لك خفت تزعل عشان طول عمري بأكلم تانت و أراسلها .. صحيح حضرتك مش من النوع اللي بيقول اشمعنى .. و دي مش أخلاقك.. لكن أنا حسيت إني نفسي أكتبلك .. و بعدين إحنا نطول نراسلك .. شوف كلام في سرك.. انا بأموت في حضرتك.. و بصراحة لو كنت شفتك وأنت صغنون.. ما كنتش هتفلت من إيدي.. وأنا صارحت تانت إني كنت هأخطف حضرتك منها .. بس هي افتكرتني بأهزر..على كل حال.. برضه ابنك .. من ريحتك.. هو صحيح عيار 24 بس حضرتك حتة برلنت نادرة و الله.

عامل ايه يا أنكل .. و أخبار السكر و الضغط ايه.. و إزي تانتي عاملة ايه؟ و صحتها اخبارها ايه؟ اوعوا تكونوا ملخبطين في الأكل.. و بعدين نقيس السكر نلاقيه ضارب..أنا نفسي حضرتك تستشير الدكتور في عشب اسمه "حرجل سوداني" بيغلوه مع الحلبة و يشربوه على الريق علشان السكر ينزل.. بس رجاء استشارة الطبيب قبل استخدامه.

عزمت تانت فين في الفالنتين ؟
ربنا يطمنا عليكم يا رب.. باقول لحضرتك ايه .. احنا داخلين على شهر مفترج و أيام مباركة وعيد الأم على الأبواب.. مش عايزين تطنيش .. جهز" كادو" محترم علشان تانت تنبسط منك.

قللي و" إر "و اعترف يا أنكل .. عزمت تانت فين في الفالنتين؟.. شكلك "كبرت" و قلت لها إن دي أعياد الفرنجة ومالناش دعوة بها .. أنا بافكر اصطاد في الماء العكر و أوقع بينكم.

بصراحة.. أنا عايزة أعترفلك.. إني أسفنت كتير بايناتكم.. و يامة قومتها عليك.. و قلت لها :"ما تسكتيلوش .. تخرب ما تعمر.. هو دافع مهر اد ايه علشان التعب اللي بتتعبيه ده.. بس تخيل.. هي كانت تضحك.. و كل لما انا أهاجم.. تقوم تدافع و تحن و تقوللي : حرام يا دوللينا و تقعد تفتكر لك الحلو كله.. و اطلع انا الوحشة في الآخر.
خلاص نطلع منها إحنا.. و عموما .. كويس ان حضرتك ما عزمتش تانت في" الفالنتين " في أي مكان برة البيت.. و عشان اثبت لحضرتك نوايا الحسنة في الرسالة دي.. و ما تفتكرنيش بأتهكم.. هاقلك ايه نهاية اللي بياخد مراته و أولاده و يعزمهم في الفالنتين.. بس قبل ما احكيلك على مصيراللي بيفسحوا اهلهم في" الفالنتين " نفسي اقلك:

وحِشني أوي.. وحشني كلكم ..البيت وحشني .. و اللمة الحلوة و الأكل الرهيب الي تانت بتعمله.. والفاكهة الجميلة اللي حضرتك بتجيبها لنا و بتنقيها بنفسك.. و نقعد نقلك محمود بيحب الجوافة .. فتنزل تشتري له اكبر صندوق جوافة .. محمود نفسه في مش عارف ايه .. فتنزل تشتريه جري .. مش بأقلك إحنا بنستغلك بإسم الاحفاد.

تاني وحشني .. و وحشني كلكم .. و وحشني المشى الصبح في المعادي .. و وحشني تجهيز نفسنا لزيارتكم.. و وحشاني الفرجة على المحلات و هي بتستفتح بالقرأن.. و الأرض امام المحلات مرشوشة علشان البياعين دالقين مياه.. ما تفهمش ليه.. يا الله.. زروطة بزروطة.
تعرف.. أنا بأقعد افتكر منظر الكناسين الصبح و هما ماسكين المقشات بيأس.. أصل هينضفوا إيه و لا إيه؟
و أتخيل منظر الموظف من دول وهو مركب مراته وراه في الموتوسيكل .. و ابنهم في الوسط .. و بنتين تلاتة مقعدهم في ملحق الموتوسيكل.. هو الموتوسيكل العائلي ده اسمه ايه؟ باين تريسيكل..
هنا في الدوحة .. رب الأسرة القطري بيشحن أسرته في سيارة" لاند كروزر" شكلها شبه الميكروبصات.. يا الله.. أهو التريسكل بيسمح للعائلة بالتمتع بالهواء الطلق" الفريش" و الأوتوبيسات برضه بتسمح للناس تلتحم بقوى الشعب.

من اد إيه كنا هنا .. من شهر فات و لا سنة ؟

من اد ايه كنا هنا .. من شهر فات و لا سنة .. وحشاني سماع الاغنية دي في البلكونة عند حضرتك.. و وحشني شرب الشاي في فنجان زجاج بعد الغداء.. و تانت تقعد تقول: استنوا شوية علشان الشاي بياخد الحديد من الجسم .. و واحشني رغيي معك و محاولتي استنطاقك .. لأن حضرتك بصراحة .. هادي جدا.. و تخيل مع أني بقيت انطوائية جدا.. لكن انا بأحب أرغي معك و بأتبسط جدا لما تقعد تحكيلي على أيام دراستك في انجلترا و شغلك في إسكندرية و العراق و الجزائر و لبنان و سفرياتك لألمانيا و فرنسا و مشاكل العمارة والمحاميين النصابين و ذكريات ياسر و هو صغير.. بذمتك ما بتضايقش من نكشي ليك كل شوية ؟

وحشني المخ و الكبدة بتاع الشرقاوي والفول و الطعمية بتاع الشبراوي والتابعي الدمياطي .. والطرب والكباب بتاع شاكر و أبو شقرة فرع القصر العيني بس .. و السمك والجمبري بتاع أمير واسماك الجندوفلي و الحرية و خريستو .. والبليلة والعاشورة والأيس كريم بتاع صابر.. و كشري العمدة واللب الأبيض السوبر اللي مش بالاقي زيه غير في "المقلا" بتاعت صلاح الدين و"العبد".. اللب هنا في الدوحة بيستوردوه من لبنان.. بيبقى كبير بس مختلف خالص عن المصري.
وحشني "أزأزة" السوداني و الحمص والترمس على الكورنيش.. عارف حضرتك .. بيسموا هنا الفول السوداني ايه؟..أنا اقلك.. بيسموه..فسدق العبيد.. بصراحة مش عارفة أعلق!

وحشاني سندوتشات "مؤمن و كوك دور" مع انها بقت تعبانة جداً و طعمها بقى صعب و كمان غالية .. لكن اصل "الدلفري"بقه غية.
وحشني الرز بلبن بتاع "بسمة" و شرب السحلب والشاي الاخضر في قهوة الفيشاوي في الحسين .
وحشني طوابير الجمعيات و لافران و اللف و الدوران حتى نجد مكان للركن .. عارف زمان- بابي الله يرحمه- كان لما يركن صف تاني .. يقوم يقلنا.. لو العسكري جيه .. قولوا له: هو جاي حالا.. فانا ووليد – علشان زعلانين انه سايبنا ملطوعين في العربية.. نقوم إحنا اللي ننادي على العسكري و نقل له: على فكرة يا أنكل .. بابي مشي من فترة و إتاخر.. و راكن غلط .. ممكن تاخده مخالفة!
لغريبة إن الراجل يضحك و ما يكتبهاش.. و إحنا نتغاظ .. كنا اشرار جدا يا أنكل
على فكرة انا مش مفتقدة موضوع ان الواحد ياخد اذن ساعتين من الشغل لقضاء مصلحة في المجمع و لا غيره.. فيضيع اليوم كله على اللف" كعب داير" على الموظفين .. و ما يقدرش يرجع الشغل فيتخصم اليوم كله.

القطريين مناخيرهم متكلفة!

لكن وحشني المشي في الصاغة والغورية و شرا الكلام الفاضي .. و البخور ..
تعرف :
لبخور هنا في قطر والخليج .. موضوع تاني خالص.. القطرين و أهل الجزيرة العربية كلهم.. مناخرهم متكلفة – التعميم غلط بس لزوم الافية - المهم فعلا هنا بيصرفوا على مناخيرهم صرف.. البخور و العود هنا بيتباع بحاجة اسمها التولة.. التولة دي بتاع خمسة جرام.. و ثمن جرام العود المعتبر بيصل لألف ريال و في أغلى.. أما عطور دهن العود هنا .. فأسعارها "وهم" التولة في محلات عبد الصمد القرشي.. بيت العود و العنبر و العطور .. بالالفات.. اصلها من كمبوديا و .. ده عطر الشرق.. مش أي أي.
أما أسماء البارفانات فتجدها فخيمة .. يعني يسموها" العود الملكي".. فنار..كشخة..أسرار..عود مكة الملكي .. أمواج..دانات..العنود..
المهم.. هو ايه اللي جاب السيرة .. سيبك .

اه.. وحشاني الزينة و الفوانيس اللي بتملأ الشوارع من أواخر شعبان لنهاية رمضان في ميدان الاسماعيلية و صلاح الدين و الحسين و القلعة وشبرا ..وحشني منظر زحمة شوارع القاهرة في رمضان و منظر نفس الشوارع و هي ساكتة و فاضية قبل المدفع بخمس دقائق و وحشاني مطبات الشوارع و إشاراتها.. وحشاني القلعة و الهرم.. و وحشني النيل و المعديات والمراكب و الفلايك .. و وحشني صوت المترو لما بيمشي و يهز العمارات في مصر الجديدة.

بأمانة.. وحشوني "مسيحيين شبرا"

و – بأمانة و من غير تهكم- وحشني جدا "مسيحيين شبرا " اللي تقدر تعرفهم من طريقة حلفانهم ومن شكلهم.. حتى لو ماشيين في جاردن سيتي .. الستات دايما لابسين فساتين سودة و شعرهم قصيرو لونه أبيض.. و الرجالة بدل لما يحلفوا يقولوا: بأمانة.. و بعضهم يقول و" المسيح الحي و العدرا".
وحشني سماع الخبر السنوي عن حضور المفتي و شيخ الازهر و كبار رجال الدولة لوليمة الإفطار اللي بيقيمها الأنبا شنودة في رمضان .. خلاص بقه.. العزومة رسخت معاني الوحدة الوطنية بين عنصري الأمة.. أوعى تفتكرني بأسخر .. لا ده أنا بأتعجب من الاهتمام بالشكليات .

وحشني الفرجة - مع العيلة - على المسلسلات و البرامج الهايفة بتاعت رمضان.. وتخيل وحشاني أسئلة المذيعات المكررة .. البايخة اللي حفظناها واللي على وزن:
اين ترعرعت سيدتي؟ ايه شعورك لما حصلت على جائزة احسن ممثل؟..يعني هيزعل مثلا!
إبه أكثر موقف محرج تعرضتله و أنت بتصور الفيلم؟ ممكن تحكيلنا على كواليس الفيلم؟
إيه هي أسباب غيابك عن جمهور التلفزيون؟
تقوم تقول: أصل التلفزيون بيحرق الفنان
و لما الممثلة من دول تعملها تمثلية.. تقوم المذيعة الغلسة تقلها: هو أنت اتجهتي للتلفزيون بعد لما السينما هجرتك؟!.. يعني يا عجوزة يا كركوبة.. راحت عليكي و ما بقتيش تنفعي..
هل تهتمي بالرد على الشائعات؟
لا طبعا.. ثم إن الشجرة المثمرة هي اللي بتترمي بالزلط.
او ايه مواصفات فارس احلامك؟..
تقوم قايلة.. انا عايزة واحد يخطفني على حصان ابيض
فارس إيه و بتاع إيه.. بإزمة مش حتة" تويوتا كورولا" و لا حتى "كريسيدا " تبقى أنفع.. و بعدين بنفس ثمن الحصان تقريبا .
لماذا لم تتزوج بعد؟
ابحث عن بنت الحلال
هل الزواج يعوق الفنان؟
الزواج استقرار للفنان
و لو الفنانة او الفنان متزوج
هل ندمت على عدم انجابك؟
فالاجابات تتراوح بين
اصل الفن في دمي و أهم من أي شيء و أنا أحب أضحي من اجل فني
و لو الفنانة مخلفة تقول:
الفن سرق أمومتي
و هل ترحب بدخول ابناؤك عالم الفن؟
انا اترك لهم الاختيار
كيف تتعامل زوجتك مع المعجبات؟
زوجتي صديقة معجباتي..
.. المذيعات دول ما بيتكسفوش و هما بيسالوا الاسئلة دي..
اه و نسيت أقلك على" المهاتية" الي بيهاتوها المذيعين.. سعيا لاقناع المشاركين بمداخلات لخفض صوت التلفزيون والتحدث من التليفون .. و الموضوع ده شبه مستحيل .. لأن المشارك بيكون هيموت علشان يسمع نفسه وهو بيتكلم في التلفزيون..
وعمر ما حد بيسمع الكلام و لازم نسمع صدى الصوت.. و يضيع وقت البرنامج في مهاتية و كلام فاضي.
بس – بصراحة – إحنا اللي غلطانين عشان بنتفرج على الهلس ده.. تعرف هما لازم يكتبوا في أسفل الشاشة ان المشارك اللي هيعلي التليفزيون هنقفل عليه الخط و ستلغى مشاركته.
فكرة جهنمية .. هو الواحد بقه شرير اوي كده ليه؟

اه يا انكل اه.. سيبك انت .. بس القعدة بتبقى حلوة.. اهو.. أي برنامج بيبقى صوت أو أي وش و زيطة و السلام .. لزوم التسالي.

وحشاني الاوكازيونات المضروبة في مصر في روكسي و المولات و وسط البلد.
وحشني سماع صوت الشيخ رفعت لما بيأذن لصلاة المغرب بعد المدفع..و مفتقدة جدا عزومات رمضان و سماع الراديو على الفطار والاشاعات اللي بتطلع في مصر وخصوصا قبل العيد .. فاكر اشاعة يوم القيامة واشاعة جواز احد الرؤساء من أخت وزير سابق و إشاعة موت عمرو دياب و الإشاعة بانتشار الحرية و الرخاء الي هتعم مصر مع حلول الألفية الجديدة!

وحشاني أيام العيد في مصر و نزولك الصبح للصلاة في جامع سمير وهبة اللي جنب المطافئ.. و بعدها الغداء الجماعي و الواحد يلبس لبس العيد و يبدأ الزيارات العائلية و نشتري البمب و الصواريخ و العديات.. و لو أن الواحد كبر على العديات.. بأقول لحضرتك إيه .. أنا ما كبرتش و لا حاجة..:)

هنا في قطر في حاجة اسمها الكرنكعوه .. و في الخليج اسمها "الجريجعان" و هو عبارة عن احتفال للأطفال في النص التاني من رمضان. الاولاد بيلفوا على البيوت و الناس تعطيهم مكسرات و حلويات.. كيلو الكرنكعوه وصل ثمنه 200 ريال في محلات "الحلويات السويسرية".. و في "البتيل" و "أوبرا "و "باتشي " بيكون أغلى .. يا الله ..خلي الأولاد يفرحوا .

واحشني استقبالك لينا في المطار و انت طاير من الفرح و توديعك لنا و إحنا مسافرين و أنت ماسك دموعك بالعافية.

وحشتني مصر كلها.. و وحشتني مصر الجديدة
و اقعد افتكر" ريحة "الشوارع في الصبح و أغنى
صباح الخير يا مصر الجديدة
صباح الخير يا مصر البعيدة
صباح الجرح ع المكشوف
صباح الدبح في المجروح
صباح ممسوح
و دموعه نازلة مفتفتة
شبه فتارين وسط البلد
وسط الشتا
مين اللي كتب النص ده.. شكله كده أحمد فؤاد نجم.. مش كده يا انكل؟
انا عارفة انك بتحب " نجم" جدا .. اه يا معارض ..:)

تخيل احمد فؤاد نجم ده طلع راجل عجوز جدا .. مع إن شكله ما يديش انه اتولد في العشرينات و كمان كان" أمي" و اشتغل في الأول شغلنات تعبانة جداً .. مكوجي ولاعب كرة و ترزي.. و اشتغل كمان في السكة الحديد.. على فكرة.. انا باتكلم عن أميته ليس بغرض العيب فيه .. بالعكس د انا أتعجب من حكمة ربنا اللي بيورينا إن.. الطين بيطلع منه قمح و إن قاع المناجم بينتج منها ذهب و ماس.. و إن السجون بتخرج شعراء!!

المهم .. نجم لما اشتغل في معسكرات الجيش الانجليزي في فايد .. قام قابل عمال المطابع.. وكان بدأ يعلم نفسه القراءة والكتابة...وساعدوه في نشر دواوينه اللي إتسببت في سجنه 18 سنة من عمره ..
الغريب ان نجم .. بعد لما بقه نجم.. لسة مصمم يسكن في حجرة متواضعة في حارة "حوش قدم"..ما هو من الشعب الفقري اللي كتب فيه قصيدة "شعب فقري"
ايه اللي جاب سيرة نجم؟
كلب الست ذيه .. ذي كلب الأمير
اه افتركت.. هاحكيلك بقه ليه قلت لك أني سأجد لك مخرج وعذر تقول له لتانت عشان ما خرجتهاش في الفالنتين..

أصل أنا من أسبوعين كده شفت" نجم" في برنامج مستضيفه لتحدث في موضوع كده .. الحكاية إن كان في أب عازم عائلته في فندق – موفمبيك- بمناسبة الفالنتين.. المهم الراجل ده عنده بنت صغنونة اسمها حبيبة .. كانت زي القمر.. اللي حصل أنها كانت تلعب في حديقة الفندق.. ففوجئت بكلاب حراسة وولف ضخمة من اللي بيعذبوا بها العراقيين في سجن أبوغريب.. الكلاب نطنت علي حبيبة .. قطعتها و شوهتها ..
فالبرنامج استضاف "نجم" علشان هو كان كاتب نص اسمه" كلب الست" حكى فيه عن حادثة مماثلة.. كلب مشهور عض مواطن نكرة في الشارع.. بس لأن كرامة الكلب من كرامة صاحبته المشهورة.. فطلعوا- الكلب و صاحبته- منها ذي الشعرة من العجينة.. طبعا حضرتك عارف ان الكلب كان بتاع الست أم كلثوم.
عارف يا انكل:
كل لما أفكر في حديث سيدنا محمد" لو فاطمة بنت محمد سرقت لقطعت يدها". . باجد عذر للحكومة إنها لم تعاقب الست أم كلثوم .. لأن إسمها أم كلثوم بنت إبراهيم .. مش أم كلثوم بنت محمد.. عليه أفضل الصلاة و السلام.
يبقى أن تعرف يا حماي العزيز إن حبيبة وقعت تحت أسنان كلاب الأمير ترك بن عبد العزيز.. و وجهها إتشوه.. و طلعت الأميرة سماهر بنت ترك في مداخلة هاتفية مع البرنامج.. علشان تلبس والدة البنت المصيبة.. و طلعتها هي الغلطانة.. وكمان طلعت أهل البنت جشعين و طماعين علشان والد حبيبة طلب 100 الف دولار مصاريف العمليات اللي هتتضطر حبيبة للقيام بها في وجهها .. و المذيعة تلاطفها في الكلام و تخاطبها بسموالأميرة .

أنا بقه اللي نفسي أعرف - يا ترى- لو كانت الكلاب دي نهشت سمو الأميرة و هشمت وجهها الملكي السامي.. كان هيبقى الوضع ايه؟ و كان 100 مليون دولار – مش 100 الف- هتكفيها تعويض؟!!

صحيح ..ما أصعب العيشة في بلد .. اللي إذا نهشت فيه كلاب الأمير وجه طفلة .. تركوه .. و غلطوا مامتها.. و إذا عضت ناموسة خد الأميرة .. قتلوها.. أقصد قتلوا الناموسة و أحيوا نواميس أخرى تتماشى مع الأوضاع الأميرية..

طبعا البرنامج استضاف ما أصبح يطلق عليهم " النخب المثقفة" و اه من النخب المثقفة دول.. و هما على فكرة بيتعرفوا بسهولة..و تجدهم يرتدون ماسك الوقار و الجدية.. و لازم كلامهم يدخل فيه جمل من عينة "حيث أن .. لما كان"
"في الواقع فإن السيبرناطيقة .. هي عودة للأمام"
"في حقيقة الأمر، فإن العولمة و الحداثة هي محاولات التأصيل لدفع التهميش المرجعي "
"إذ ربما التبرير لردم الهوة يدفع للجنوح نجو التشرزم الاثني"
"الابعاد الهرمنطقية في المسألة الجمعية "
"السيولة‏ ‏الإقليمية‏ وتحدّيات الاستقطاب‏ ‏المدمر‏ ‏"
"بين الوثائق الانتقائية وعودة التأزيم المحيطي"
"بلورة التصورات الإعتلامية اللا محدودة"

و بعدين النخب دول بيتم تعريفهم بشكل غريب .. يعني يقلك ناشط أو ناشطة.. و تلاقي الناشطة من دول لابسة بتاع عشر خواتم فضة في يدها و نضارة كعب كوباية – لزوم القالب الجاد- و منظرها صعب جدا .. و النشطاء دول مشكلين.. يعني في منهم ..الناشط السياسي .. والناشط الاجتماعي .. و الناشط الحقوقي .. و الناشط التطوعي..المهم طالما انه ناشط فطبعا لازم المشاهد يشعر انه خامل.
ما دمت نفطياً.. فعزك لن يدوم

المهم.. تجد كلام هؤلاء النخب "مجعلص" و دائما ضيوف في برامج د. فيصل القاسم و مي شدياق و احمد منصور و زاهي وهبة..
فالبرنامج استضاف شوية من" النخبجيين دول"و هاتك يا غل و حقد في النفطيين.. اش دخل البترول في الموضوع ؟ نفسي أفهم.. يعني نفرض إن واحد من أمراء الخليج تصرف غلط.. ليه نلعن النعمة كلها و نحكم على شعوب الخليج كلها إنها على نفس الشاكلة !
و بعدين من غلهم عمالين يتوعدا بالشماتة.. يعني لسان الحال بيقول:
"ما دمت نفطيا فعزك لن يدوم" و دي كلمة قالها شاعر بحريني اسمه عبد الرحمن. ناسية عبد الرحمن ايه.

طب هو بيقول كده كنوع من التحذير لدول الخليج من الإنفاق ببذخ؛ لأن النفط لن يدوم.. لكن النخب المثقفة فشوا غلهم في الخليجيين و خلاص سموهم " النفطيين" و كلامهم كان معناه: إلاهي و انت جاهي.. تفتقروا يا أمراء يا ولاد الأمرا.. انتم و كلابكم اللي بتنهش في بناتنا.. الغريب بقه إن حتى احمد فؤاد نجم اللي كتب قصيدة "كلب الست" في واقعة كلب أم كلثوم.. اعترف انه ممكن يجد عذر لكلب الست أم كلثوم .. آل يعني ..احتراماً لمكانتها الفنية في الوطن العربي.. لكن لا يقبل أن تنتهك طفلة صغيرة من كلاب أمير سعودي.. شفت خيبة و تمييز ذي ده!
كلام كتير أوي- يا أنكل - إتقال في النفط و النفطيين.. و ما تفهمش ليه الشعراء من زمان بيتكسبوا من الشعر و يلعنوا من اكسبهم و ما كسبوا!!
يعني فاروق جويدة تسائل: من قال ان النفط اغلى من دمي؟

ما دام يحكمنا الجنون..
سنرى كلاب الصيد
تلتهم الأجنة في البطون
سنرى الصغار على المشانق
في صلاة الفجر جهراً.. ينهشون

مؤثرة أوي أبيات فاروق جويدة يا أنكل.. مش عاجبه أموال النفطيين.. و مع ذلك ..هو نفسه بيتكسب من أموال مبيعات كتبه المباعة في مكتبات" جرير" في دول الخليج الست و" السقيا" في لندن اكثر بكثير من الملاليم اللي بيحصلها من حصيلة مبيعاته في مكتبات مدبولي و دار الشروق في مصر .

و اه يا انكل لو سمعت نزار و هو بيقول:
هجمَ النفطُ مثل ذئبٍ علينا فارتمينا قتلى على نعليهِ
وقطعنا صلاتنا.. واقتنعنا
أنَّ مجدَ الغنيِّ في رجليه – هو بصراحة قال حاجة تانية غير رجليه
أمريكا تجرّبُ السوطَ فينا وتشدُّ الكبيرَ من أذنيهِ
أمريكا ربٌّ.. وألفُ جبانٍ بيننا، راكعٌ على ركبتيهِ

غريبة اوي الشعراء امثال نزار.. يرتدوا ساعات سويسرية و بيدخنوا سيجار انجليزي و يشربوا خمور فرنسية و يعصتروها في قرائحهم.. ثم ينتجوا لنا شعر يذم كل ما يمت للغرب بصلة!!
تعرف يا أنكل.. إن نزار هو سفير الشعر بلا منازع .. و مفرداته
Unique
يعني بيختلق الكلمة و له قاموسه الخاص و الشيخ الكبيسي قال عنه أفضل شاعر في القرن العشرين .. المهم .. – الله يرحمه كتب قصيدة" الحب و البترول" يظهر كان فاكر ان الخليجين هما بس سبب الوقعة السودة الي احنا فيها:
تمرّغ يا أميرَ النفطِ.. فوقَ وحولِ لذّاتكْ
لكَ البترولُ.. فاعصرهُ على قدَمي خليلاتكْ

كهوفُ الليلِ في باريسَ.. قد قتلتْ مروءاتكْ
على أقدامِ مومسةٍ هناكَ.. دفنتَ ثاراتكْ

فبعتَ القدسَ.. بعتَ الله.. بعتَ رمادَ أمواتكْ
كأنَّ حرابَ إسرائيلَ لم تُجهضْ شقيقاتكْ

.. تغوصُ القدسُ في دمها وأنتَ صريعُ شهواتكْ
متى تفهمْ ؟متى يستيقظُ الإنسانُ في ذاتكْ ؟

شفت الكلام الكبيرالمتكلف ده يا انكل؟! يا خوفي لا نكون كلنا بنسترزق النعمة و نلعنها ونلعن السبب فيها.
المهم يا أنكل .. بعد واقعة" حبيبة "بيومين .. حصل ان شاب -16سنة- قاد سيارة والده بدون رخصة وبسرعة جنونية .. فقتل خمسة.. و هو نفسه إتهشم .. فنفس البرنامج استضاف والد هذا الشاب .. وأجلسوه أمامهم كسير ذليل.. يفكرك بتوفيق الدقن في فيلم صلاح الدين لما حوكم على خيانته فقالك: "إرحمني"
ارحم مين.. ربنا الي بيرحم.. و طبعا ما فيش بقه .. عظمتك و فخامتك وسمو الأمير و لا حتى حضرتك.. و تحقيق و جلد من فوق و تحت الحزام و فين يوجعك.. والراجل مسلم و مقر انه هو وابنه مخطئين و متحملين المسئولية كاملة.. ومستعد يدفع الدية و كل حاجة.. بس طبعا لم تأخذهم به شفقة و لا رحمة .. و طلعوا فيه القديم و الجديد..

اوعى يا أنكل تفهم مني إني بأقلل من اللي عمله و لا بأهون من الجريمة اللي ابنه ارتكبها ..
هو أنا بأقول إن الراجل مش غلطان هو وابنه أو ما يتعاقبوش ؟
أبداً ..بس متضايقة من الكيل بمكيالين إذا لأمر تعلق بالأمراء والفقراء..
أنا أصلي.. موتي و سمي موضوع ازدواجية المعايير في التعامل و التحاكم و التظالم و التصالح.
أعوذ بالله من السلطان الرجيم
أه من الأمراء والسلاطين .. ربنا ما يسلط علينا سلطان يا أنكل.. قول أمين..
احمد مطر- بقه- كل لما يكتب قصيدة يقوم يستعيذ بالله من السلطان الرجيم.. و مرة كتب عن وجه الحاكم في قصدية اسمها" كابوس":
الكابوس أمامي قائم.. قمْ من نومكَ..
لست بنائم
ليس، إذن، كابوساً هذا
بل أنت ترى وجه الحاكم
هو إحنا ليه بنكره حكامنا؟
.. هو احنا ليه بنكره حكامنا؟ أنا عمري ما شعرت ان في شعب عربي بيحب حاكمه بجد إلا الشيخ زايد- الله يرحمه- و الفرنسيين كانوا بيحبوا شارل ديجول برده ..لكن الاماراتيين كانوا بيحبوه الشيخ زايد من قلبهم..اصله كان ممنجهم عا الاخر.


جمال عرف "دخانيئ" كار السياسة
انت عارف حضرتك يا انكل:
إن في أشاعات اليومين دول و مقالات و كلام طالع إن جمال مبارك ناوي يخلف والده الرئيس مبارك - بعد عمر طويل إن شاء الله- و بصرف النظر عن صحة الموضوع من عدمه.. لكن التعليقات غريبة جدا
مرة سمعت واحد بيقول .. طب و فيها ايه:
ما رانية بنت محمود يسن طلعت زي باباها ممثلة
و شيرين بنت سهير شلبي طلعت زي مامتها مذيعة
و يوسف غالي بن اخو بطرس غالي طلع لعمه وزير علشان بطرس غالي ماخلفش .. بس برده العم والد!
و بن الكاتب الكسندر ديوما طلع كاتب رده!
فانا قمت كملت له
: فعلا و حتى شريف بن عمتي طلع دكتور زي باباه و مامته
واغلب اولاد الدكاترة بيتخرجوا دكاترة
و ياسر طلع مهندس زي حضرتك
و أولاد عم مامي كلهم كانوا وارثين مهنة تجارة الحديد من جدو محمد اللي ورثها من جدو عبد القادر قبل ما" أحمد عز" يحتكر الحديد في مصر
و ابن سعيد عبد الغني طلع ممثل زي والده
و"بوش الصغنون" طلع رئيس امريكا ذي" بوش الكبرنون"
و شيرين السرجاني و أختها صافي زميلاتي في المدرسة طلعوا جواهرجية زي باباهم و شربوا الصنعة.
و نيهاد بباوي - زميلتي برده في المدرسة - طلعت صيدلانية زي باباها
و رانيا فريد شوقي طلعت ممثلة زي والدها
و حنان مفيد فوزي طلعت صحفية زي باباها
و احمد اكرامي حارس المرمى ورث الحراسة من والده وحش افريقيا
و عمر خيرت طلع موسيقار كعمه ابو بكر خيرت
و ايمن بهجت قمر طلع شاعر ذي والده
و بهاء جاهين طلع كمان شاعر ذي باباه صلاح جاهين
و طارق أصبح مقرئ كوالده الشيخ عبد الباسط عبد الصمد.
و اولاد صفوت الشريف و كمال الشاذلي و ابراهيم نافع طلعوا مناصب كبيرة ذي أهلهم.
و جويل ماردينيان طلعت خبيرة تجميل ذي مامتها اللي كانت بتشتغل ماكييرا.
و ابن احمد عدوية طلع برده مغني
و وزير الخارجية السابق أحمد ماهر طلع لعمه احمد باشا ماهر
و ملكة جمال فرنسا حصلت على اللقب بعد 30 سنة من تسلم والدتها نفس التاج
و كمان الرئيس الراحل الأسد ..تقلد شبله "بشار" حكم سوريا بعد وفاته.. مع أنهم مصممين أن سوريا جمهورية مش ملكية.
و بنت فضيلة الشيخ الحصري رجعت لمجال الدعوة زي والدها و تركت الغناء.
و بنت سمير غانم دخلت مجال التمثيل كوالدها و والدتها
و انطوان دولون بن الان ديلون طلع ممثل كوالده.
و جين فوندا طلعت ممثلة ذي باباها هنري فوندا
و انريكو اجليسياس بن خوليو طلع مغني ذي باباه
و بنت دادة ام شفيقة برده طلعت دادة ذيها
و "فزاع" طلع أمير زي باباه الشيخ محمد بن راشد آل مكتوم..
المهم.. فزاع كان عامل كليب خرافي- يا انكل- عن قصيدة كاتبها في الشيخ محمد بن راشد إسمها " فخر الأجيال" ناس كتير انبهروا بالقصيدة- وأنا منهم- لكن لما عرفوا إن فزاع هو بن الشيخ محمد.. قالوا .. تلاقيها مكتوبة له.. شفت- لأي درجة - ما عندناش ثقة في الكبار بتوعنا .. زي ما تقول كده مستكترين عليهم إنهم يبقوا أغنياء و عندهم المال و السلطة .. فكمان ربنا يوهبهم الشعر.. يا ساترعلى الأحقاد يا أنكل!
طب ليه نستكثر على جمال مبارك يطلع رئيس ذي باباه .. ما أكيد شرب الصنعة و إرتوي من الرئاسة.. وعرف" دخانيئ "الكار بتاع الوالد..

" بن اللواء لازم يطلع لواء ..و بن الفقير لازم يطلع فقير"

تعرف حضرتك .. من أسبوعين استضافوا في التلفزيون .. رجل غلبان.. تشوفه تلاقيه أقدر من جسد الفقر المصري و شظف العيش كما أنزل.. يعني راجل مش فقير .. مش معدم.. لا.. تقدر تقول عليه ..العدم نفسه.. هو عايش مع عائلته المكونة من 9 أفراد في مركب على النيل .. و المذيعة تفكرك بعادل إمام لما سأل الحاجب : "معقول إنت والعيلة سايبن الشقة كلها وعايشين في الأوضة؟"
.. فقياساً المذيعة.. بتقلهم: سايبين وادي النيل كله و عايشين في المركب!! (وادي النيل دي من عندي.. هي قالتلهم سايبين النيل كله )

"أتٍ .. أتٍ.. أ أ تن"
بس .. استغفر الله.. أنا غلطت لان كلامي ممكن يتفهم منه إني بأتهكم على سارة أسامة مراسلة برنامج" 90 دقيقة".. بالعكس البنت دي هايلة و عملت – يا أنكل- تقرير خرافي عن أسرة هذا الرجل الغلبان.. المهم هي فعلا تساءلت اذا كانوا عايشين كلهم في المركب.. بس سؤالها كان للاستنكار وإظهار التعاطف..
المهم الراجل الكحيان ده قالها كلمة تلخص الموضوع كله:
قالها: يا بنتي" بن اللوا لازم يطلع لوا ..و بن الفقير لازم يطلع فقير"
التعليق المؤسف اللي انا سمعته.. كان غريب جداً.. واحد قالك ايه: و ماله لما أولاد الرؤساء يخلفوا أباؤهم.. طب ما أولاد الأنبياء ورثوا النبوة و صاروا أنبياء!!!
طب ترد تقول ايه – يا أنكل- على المخ التعبان بتاع الناس دي ؟

تعرف.. واحد صحفي إترسخت عنده قناعة إن جمال مبارك هيأخدها.. يعني هياخدها ..فقال لي: يا داليا جمال - زي الغضب الساطع - أتٍ أتٍ.أأتِ
مش فاهمة ليه التطاول و استباق الأحداث ده يا أنكل.. بصراحة أنا ضد الكلام ده جملة و تفصيلاً.
اقلك إيه .. طب بص .. مش أنا اللي هاقول .. خلليني اسمعك البيتين -اللي مالهمش لازمة -اللي قالهم احمد فؤاد نجم لجمال مبارك بمناسبة زواجه

.. يعني بدل لما يباركله على جوازه قام قاله:
مبروك يا عريسنا
يا أبو شنه ورنه
يا واخدنا وراثه

يا عريس الدولة
أفرح وأتهنى
ح تكمل دينك
وتطلع دينا

طب برده ده اسمه كلام و لا اسمه حتى شعر .. ليه التعليقات القاسية دي..
"رؤيتئ و حياتي "
و على سيرة الأمراء و الناس" الهاي" .. شفت - حضرتك- الاعلانات اللي أذيعت في "الام بي سي" عن كتاب" حياتي" بتاع الأميرالوليد بن طلال.. طبعا مختلف عن " كتاب حياتي عين" المهم أنا اشتريت الكتاب قبل ما يعلنوا عنه.. و شوية كده و قناة دبي أذاعت إعلان عن كتاب
" رؤيتي" للأمير الشبخ محمد بن راشد بن مكتوم حاكم دبي.. إذاً.. نحن أمام منافسة فكرية بين عملين إبداعيين لأميرين عربيين .

بصراحة أنا غاوية قراءة تراجم و مذكرات.. بس مش ناوية اشتري كتاب رؤيتي .. أصله هينزل على الإنترنت و ممكن ابقى احمله على الكمبيوتر .. اصلي دفعت كتير في كتاب الاميرالوليد و بعدين نزل على النت .. فاكيد شوية و هينزلوا كتاب الشيخ راشد بن مكتوم على النت برده.
هتان.. صاحبة سمو إنساني
و ما دمنا في سيرة الامراء.. هاحكيلك يا انكل عن لقائي بأميرتين سعوديتين..الأولى هي الشاعرة هتان أو الأميرة لينا العجاجي وهي صاحبة سمو ملكي- برده- لأنها أرملة أمير سعودي..
كنت رايحة اعمل معاها حوار بمناسبة حضورها مهرجان الدوحة الثقافي.. رحتلها في المعاد في الجناح بتاعها في فندق اليتز.. فاستقبلتني بنفسها.. وأنا كل شوية أفشل في الإحساس إني قاعدة مع أميرة.. الست بسيطة بشكل.. و تخيل طلبت تسمع مني- أنا- الأشعار بتاعتي.. فقلتلها : لا خلينا في حضرتك.. و بعدين ضحكت .. و قلتلها :أصلي مش بأعرف أقول سمو الأميرة
فقالتلي: داليا ..سمو إيه و بتاع ايه.. و لا تكتبي حتى سمو في الحديث .. و حاولت تكلمني باللهجة المصرية توددا..و عملت معها واحد من اكثر الحوارات اللي لا أستطيع أن أنساها.
و تأكدت أني - يا أنكل- مش قاعدة مع صاحبة سمو ملكي .. لكن مع صاحبة سمو إنساني.
مرة تانية، ذهبت لتغطية معرض أقامته أميرة سعودية أخرى .. و بدون ذكر أسماء علشان اعرف أتكلم براحتي من غير ما أخد "كولكشن ذنوب معتبر" ما لوش لازمة.
رحتلها في الموعد.. السكرتيرة قابلتني قالت لي: الأميرة لسة بتلبس.. وقعدت مستنية - والثلج داب في كاس اللمون بقاله ساعات- و بعدين جت قابلتني لابسة بتاع كيلو الماظ..أكيد بابالغ ..مش كيلو بس كانت ملعلطة..و طلبت الاسئلة .. فقلت لها: أنا اصلي بارتجل مش كاتبة حاجة..
المهم كانت قاعدة غلسة .. و الوقت كان بيمر ببطء.. و الواحد شعر أنه ضيع وقته..
لكن يمكن لأن الأميرة كانت سنها صغير .. فلازم أعطيها عذر علشان .. أكيد خبرتها اقل.. وإن شاء الله لما تكبر.. تعرف إنها تقدر تحقق اكثر من اللقب اللي أخدته بالوراثة.. إذا أحسنت معاملة الناس بالممارسة. أو بالدراسة.

أنكل:

تعرف أنا بأفكر في حضرتك كتير و ساعات بأسرح و أتخيل نفسي قاعدة معك في البلكونة وأنت بتخوفني و تعمل انك بترمي محمود.
هو حضرتك طيب كده ليه؟ تعرف اني بأحبك جدا..بحب طيبتك وهدوئك وعقليتك..وبعدين حضرتك ضحكتك حلوة أوي و محمود واخد نفس ضحكتك.. بس هو - للأسف مش طالع متسامح ذيك.. بصراحة يا اأكل محمود لعبي جدا ..و بيعمل في ياسر عمايل .. مش قادرة اقلك.. بينتقملك.
تعرف انا مجرد ما اشوفك.. و من غير ما تعمل أي حاجة بأستريح او يمكن بأطمئن ..أنا عموما لما بأشوف ناس طيبين.. تقدر تقول أشعر و كاني شربت كوب نعناع دافئ.. و بعدين باشعر بالسكووون.. و أحس إني اقدر أنام في ثبات عميق.. في سلام و أمن من أي كابوس.. من غير ما احتاج للتذئب ..من غير ما أجد ضرورة للبحث عن أعذار أو اختلاق مبررات أو ادعاء أسباب .. مش محتاجة أفسر أو اشرح أواتعب نفسي.. أوأضيع وقتي في كلام فارغ.

تعرف أنا عمري ما شفتك اتكلمت وحش على حد أواغتبت حد.. فاطمئنيت انك مش من النوع الي في الوش مرايا...
عمري ما شفتك بتستقبل حد بوش مقلوب .. فباجيلك و انا سعيدة
عمري ما حسيتك بتنتظر حتى كلمة الشكر من أي حد.. فخلتني أنا اللي أحب انتظر وجودك و حضورك في كل لحظة من حياتنا.

عمري ما حسيتك بتتضايق لما أجامل تانت أو أي حد غيرك و لما بأتكلم عن حد كويس أو امدح حد .. فمش بتأول كلامي غلط .. فعلا حتى الكلمة الحلوة لا تنتظرها .. يمكن عشان كده إحنا اللي بنسعالك.
نسيم ربيع الشام
تعرف الشخصيات اللي ذي حضرتك بأعتبرهم نعمة و تصبيرة على هموم الحياة
..عارف في واحد بيفكرني بحضرتك كان زميل صحفي اسمه الأستاذ مساعد عبد العظيم وهو صحفي محترم إلى أقصى درجة و متدين و تشوفه .. تتذكر ربنا.. هو بيفكرني بحضرتك و بخالو محمد و مامي و بابا جدو عبد الحميد سيد الأهل الله يرحمه.. و بتانت نجوي عمتي و بأنكل نور- الله يرحمه- حماة وليد أخويا.. و بتانت تونيا والدة ماجدة صاحبتي.
تخيل أستاذ مساعد بيشتغل صحفي.. بس عمري ما سمعته بيغتاب حد و لا بيغل من حد و لا عنده موضوع الغيرة و لسانه نضيف جدا ..على فكرة في ناس كتير مثله .. لكن يمكن هو كمان متدين و" حيي جدا" و بصراحة الناس اللي ذيكم بيفكروني بنسيم ربيع الشام. .

انكل ..انا لما باشوفك و باشوف أمثالك . بيجي في ذهني مصطلحات " السعادة.. الرضا .. الأمان .. القناعة..الطيبة .. ما فيش مشاكل.. السلام.. الحلم ..النور.. "و بأحس إني لما باجالسك.. كأني حضرت بتاع عشر دروس دين من غير ما تتكلم كلمة واحدة.

عارف في حديث عن الرسول ( ص) كل لما اسمعه افتكرك
" عش في الدنيا كأنك غريب او عابر سبيل"
كمان مامي ليها صديقة اسمها تانت هدى .. من عينة حضرتك كده.. بنفس النفس الصافية و الهدوء المريح واللسان الطيب..و لما تقعد معها تشعر انك محتاج ريموت كنترول علشان تعللي الصوت شوية.. مش باقلك نسمة.
كل لما أنزل مصر .. أحب أزورها.. هي تقل لي : ما تتعبيش نفسك.. ما تعرفش إني بأريح نفسي لما بأشوفها .
على فكرة الخير في الناس كتير جدا و أنا مش أقصد أفاضل .. بس أنا بأسعد لما أجد في دنيتي ناس زيكم .. بأشعر إني محتجاهم مثل أعلى.. إطمئنان .. سلام.

ديدو ختيار:
حضرتك شخصية سلسة جدا اللهم إلا رأس حضرتك.. ناشفة شويتين وعنيد جدا و مش راضي تجيب تانت و تيجم تزورنا .. بس حنين.. وأنا متاكدة إنك حتلين وتجيب تانت و تيجم السن دي.. لو مش علشنا .. خليها عشان أحفادك..
و أنا حذرتك.. أنا ممكن أقسى قلبهم عليك.. و حضرتك الخسران.. أما أقول تيجي تزورنا .. لازم توافق.. أرجوك.
أنا بأحاول أحفظ محمود أغنبية علشان نسجلها لك و نرسلها لك في عيد ميلادك .. من عالم؟ يمكن تلين:
ديدو يا حلو يا اجمل غنوة
انت يا ديدو ملاك م الجنة
غالي عليا يا ضي عنيا
يا احلى كلمة نطقها لساني
ديدو يا ديدو ..ديدو يا ديدو
لو جيتلي يا ديدو..هاتبسط خالص
و هاهيص و أفرح.. خالص مالص
مين هيجلنا مين؟
ديدو
مين هيجبر بخاطرنا مين؟
ديدو
يا ديدو يا ديدو يا اطيب ديدو
هواجس الحمل..حاجة صعبة
تعرف- يا انكل- أنا لما كنت حامل .. كان بيجيلي شوية هواجس من بتوع الحمل.. و اقعد افكر ازاي اقدر احمي ابني .. و اقعد اقول في نفسي؟..
يا ترى كام محفظة هتتسرق منه لما يكبر و كام بطاقة شخصية هتضيع منه .. و هيعمل ايه لما ينسى المفتاح جوة العربية؟
و هيتصرف ازاي لما يدور على عنوان شركة رايح يعمل فيها انترفيو اول مرة و أخاف لحسن يقعد يلف و يتوه و ما يلاقيش حد يدله من غير ما يتوهه؟
و أفكر..هيضيع كام ساعة من حياته بيتفرج فيها على ماتشات كورة ترسخ نزعة الكراهية ضد شعوب مسلمة و عربية .. و يا ساتر لو ضيع له اضعاف الساعات دي عشان يحفظ اسامي اللعيبة و نمر فنلاتهم و أسامي نواديهم و مشاكلهم و خلافاتهم و ماركات جزمهم.
وأفكر هيندم و لا مش هيندم إذا ضيع فلوسه في كلام فاضي؟
و اقعد اخمن.. هل هيطلع من النوع الفنجري .. اللي بيصرف فلوسه على عزومات لأصحاب ما يستاهلوش ..
و كام الف جنيه هتيضع منه في المسجات و فواتير التليفون والهدايا لناس مش مستعنينه..
و كام ألف زيهم هيتفرتكو منه على شراء البومات القص و اللزق و الاقلام والمآلم الغالية و هو صغير
و لعب ال
Play station
في النوادي و شراء الجزم و النظارات السينيه والبارفانات البراند نيمز و هو مراهق .. و السياراات و هو شاب.
و اقعد اتخيله و هو ندمان لما تضييع منه الفرص.. و اتخيل كام ساعة هتضيع منه و هو سرحان مش عايز يذاكر قبل الامتحان؟
و كام بنت هيتمنى يخطبها .. و يلاقيها تزوجت من هو أغنى منه؟
و كام فرصة عمل هتفوته و تروح لغيره لأنه ما عندوش واسطة؟
و اتخيله أب" يتخَم " في شرا اللحمة و الخضار و بيتضحك عليه في شراء "كيتشن ماشيين" وتطلع غالية و بايظة .
تعرف النهاردة بأفكر بشكل مختلف:
تفتكر محمود في يوم من الأيام هيبقى ذيك؟
هيعرف يستحمل من غير ما يشتكي؟
هيقدر يشتغل من غير ما يهمه شكر أو تقدير من حد؟
هيطلع لسانه عفيف و ما" بيزمبقش" في الناس و لا يغتابهم.. و لا هيطلع في الوش مرايا و ... و يطلع من النوع الي يقطع في فروة الناس تحت دعاوي الفضفضة .. و دول عالم ما بيجوش غير بالسك و لازم أديهم لحسن يركبوني...
هتبقى نفسه طاهرة ..و ذهب الدنيا عنده زي ترابها وهيقدر يعيش من غير ما يقارن بين عيشته و عيشة غيره.. ولا هيطلع من النوع الي بينتظر.. و بيقدم السبت علشان ينتظر باقي أيام الأسبوع؟
هيطلع صبور.. هيطلع حمول.. هيطلع كسول ؟
هيطلع محامي.. هيطلع حرامي.. هيطلع عصامي؟
هيعيش في سلام و لا حيموت من غير دية عالحدود في رفح أو في قطر؟
هيقدر يفكر بحكمة من غير نرفزة و لا أي ناموسة هتضايقه؟و أي أسفين من زميل هيطلع عينيه الاثنين.
هيقدر يتعامل مع اللي أفضل منه وضعا و حالاً.. بدون حقد ..و لا مش هيستريح غير لما يشوف ناس اقل منه .. و يقوم هنا بس – بلسان حاله- يشكر ربنا..
هل هيكون من الناس اللي بيتاعملوا – فقط مع اللي اقل منهم – باحترام و تقدير- و لا هيقدر يُكبر من هو أكبر منه مكانة و سنا و علماً و لا هيستكتر على الناس مراكزهم و دول ما يستاهلوش و دول واكلينها والعة والكلام الهلس ده.
تفتكر .. هيسطبر نفسه مع الذين يريدون وجه الله .. و لا هيصاحب ناس هلس؟ و لا هيكون عنده جروب متدين و جروب روش ويتحول لإنسان مذبذب لا إلى هؤلاء و لا إلى هؤلاء؟
هيبقى كريم في الفلوس فقط و لا هيبقى كريم الخلق و سمح الطباع و طلق الوجه و هاش باش مع الناس؟
تفتكر – حضرتك- محمود هيعرف يحب أخته من قلبه وهيرعاها و يخاف عليها .. و لا علاقته بها هتتغير بعد لما أنا و والده نموت .. و بعد كده - و بضمير مجمد - هيستقوى عليها و يطفشها.. بتجهمه و غلظته وتكشيرته و تجاهله و سوء معاملته.. و تبقى كلمته معها بحساب و ضحكته معها بحساب و بسمته لها مدروسة و كله بحسابه.
هيطلع بن بار.. و لا هيطلع عينينا و مش هتتحسن علاقته بينا غير لما يتزوج و بعدين - بعد لما ما يبقاش فيه احتكاك بيننا- نلاقي عدو مشترك في مراته و يطلع عينها بدعوى أنه بيرضينا و هو طول عمره قارف أهله.
هيفكر في" كم" الفلوس و لا هيتمنى البركة؟
هيسلم امره لله و لا هيصاحب أصحاب المعالي والمناصب؟
هيفكر في الحلال و لا هياكل مال النبي و يحلي بمال الصحابة و يتصبر بمال التابعين؟
هيعرف يعني إيه عفة.. ولا هيتباهي بمغامراته العاطفية؟
هيتذكر النية في العمل .. و لا هيصلي ..و بعد لما يخلص يقول: نمشيها عصر.. تنفع برده.. و يعمل اللي على مزاجه و اللي على هواه و بعد كده يفصله نية محترمة .. اهو.. برده لازم يلاقي مبرر لأعماله علشان يضفي نوع من الشرعية عليها.

هيسعى للإخلاص .. و لا ربنا و الناس مع بعض . من ده على اده..
إذا نوى يصلي الفجر .. هيخشع؟ و اذا نوى يعيش في ملك الله هيخضع؟
هيكون من النوع اللي بيشكر بلسانه و لا بقلبه .. و لا بالاثنين؟
هيضع ربنا أمامه في كل عمل و لا مش هيشوف غير نفسه؟
نفسي أعرف يا أنكل .. ابني هيطلع من النوع اللي بيرضى بقضاء الله فعلا و لا قولاً؟
تفتكر هيبقى وسطي و هيقرأ عن الوسط الذهبي بتاع الإغريق و هيعرف إن خير الامور الوسط كما قال الرسول ( ص) و لا هيكون جموح؟
هيهتم بالمهمشين.. و هيقدر الفلاحين و يساعد المحتاجين و لا مش هيعرف غير الممثلين و الرياضيين ؟
همومه العويصة هيحلها إزاي؟ بأفكاره الجهنمية ؟و لا ركعتين طلب حاجة في الحسين هيقضوا الغرض و يزيلوه كربه و دعوتين في جوف الليل يمحو همه؟
هيطلع من نوعية الناس اللي عارفين هما عايزين إيه و هيعرف يحدد أهدافه و لا هيهدر عمره هباء ..و يطلع من النوع اللي يجرب في عشرات المهن إلى أن يعترعلى هوايته و منها يتعرف على هويته.
خايفة - يا انكل- يطلع من نوعية الناس اللي غاوية تجيب الغلط على الظروف و اللي واللي.. و يقول أنا كان ممكن أكون كذا و كنت اقدر أبقى كذا بس أهلى ما فهمونيش والظروف أجبرتني و الحظ خانني؟

مش عارفة.. لكن أدعو ربنا انه يكون إنسان صالح و يأخد من حضرتك كل محاسنك و يأخد من كل إنسان أحسن ما فيه.. يا رب أمين..
تعرف باختصار كده- و لو إني ما باعرفش اختصر - أنا شايفاك "السهل الممتنع" كل لما اقعد أفكر اد ايه حضرتك عندك قدرة على التحمل بدون شكوى ولو بالتلميح
تعرف انا ممكن ما اكنش من هواة الشكوى .. لكن مش زي حضرتك.. يعني ما باعرفش اشتغل في صمت .. و بيفرق معايا جدا التقدير..
و تعرف علشان ربنا يأدبني.. جعل اكثر الناس الي تفانيت في حسن معاملتهم .. يتنكروا
جعل المعاملة الوحشة تيجي منهم و بدم بارد و بلا مبالاه
شوف ربنا بيكشفنا امام نفسنا إزاي؟
يعني أنا نفسي.. ابقى لا يهمني حد عاملني كويس أو وحش طالما إني اقصد وجه ربنا.. لكن تخيل باعدي كل حاجة.. لكن بأزعل في نفسي
و أضاعف العطاء .. و يتضاعف التجاهل
و ما فيش مرة انتظر حد يكون غلط فيا .. يجي يعتذر.. و لا حد يأخد بخاطري .. الا ربنا يقوم مقسي قلبه عليا جامد.
فاخيراً.. عرفت انه - سبحانه- عايزني افكر فيه هو و بس .. ما أنتظرش غير منه و بس..
ربنا بيمتحنا.. و نفسي انجح بقه يا أنكل .. نفسي أكون ذيك في حاجات كتير اوي
بس شفت يا انكل قد ايه ربنا بيغار على قلب عبده
ربنا طيب اوي يا انكل
اوي
انت عارف انا بأقعد افكر في ايه كمان.. بأفكر انك كنت بترجع من شغلك كل يوم الساعة 5 مساء و بعدين تتغدى في السريع و تنزل تاني علشان تاخد دروس في المركز الثقافي الفرنسي – مع انك مش من هواة تعلم اللغات الاجنبية- لكن اخذت كل الكورسات علشان تذاكر لأولادك .. يعني فعلا شخصية تقدر .
عارف انا تذكرتك لما قرأت عن خبر ترشيح أحد الامهات المصريات لجايزة نوبل..
اقصد تذكرت أن هناك .. في هذا العالم.. ناس تهتم بتكريم الأهل.. على فكرة الست دي جاتلها حتة دين فكرة..
باختصار فكرت في الاستفادة من اعداد المسنين المقيمين في بيوت ايواء.. و طرحت فكرة دمج بيوت المسنين مع الدور اللي بتعتني بالمعاقين.. فمنها ينشغل كبار السن بعمل هام و منها يجد هؤلاء المعاقين من يعتني بهم.

ما تيجي بقه يا انكل.. تعرف حضرتك لو نويت كده ووافقت تيجلنا.. ممكن نعمل اللي ما يعمل.. و نسافر دول مجلس التعاون كلها بالعربية.. و كل الفسح دي هتبقة على حسك.. إنت عارف .. السفر البري ممتع جدا ..و عاملين خدمات هايلة على الطرق و قطر بتعمل مشروع كوبري يوصلها بالبحرين.
اصل قطر مالهاش منفذ بري غير السعودية..و بعدين لما الجيران بيزعلوا من بعض .. الوضع ما بيبقاش مية مية.. فلازم و لا بد و حتماً من وجود منفذ آخر..
كمان الستات مش بتقدر تسافر بري عن طريق السعودية علشان لسة جماعات الأمر بالمعروف و النهي عن المنكر في السعودية مانعين قيادة المرأة للسيارات.. لكن لما يفتتحوا الكوبري .. القيادة النسائية ستصل إلي كافة دول المنطقة.
عارف حضرتك ان البحرين خصخصت المرور .. اصلهم لقوه وجع دماغ .. و بعدين في دراسات قالت ان كل 9 دقائق في حادثة في المنامة .. قاموا خصخصوا تعليم قيادة السيارات و الفحص الفني للمركبات وحوادث التلفيات البسطة .. يعني 3 خطوات في طريق الخصخصة الشاملة و المرتقبة للمرور في البحرين؟
هو ايه اللي جاب سيرة البحرين و المرور بتاعها. أه . عشان موضوع طرق السفر. . ما علينا..
عيد ميلادك مع الرئيس مبارك.. يا سعدك يا هناك..
ديدو ختيار:
عيد ميلادك قرب..و من غرائب الصدف إن حضرتك عيد ميلادك مع عيد ميلاد الرئيس مبارك في نفس الشهر المفترج.. يا بختك و يا سعدك يا هناك يا أنكل ..أعياد ميلاد رئاسية..اللهم لا حسد.
يعني نفس البرج .. تخيل؟ هو 4 مايو و حضرتك 17 منه. .و في ذلك ِحكم.
المهم احمد فؤاد نجم كان كاتب" البقين" دول للريس في عيد ميلاده..خد عندك يا ديدو:

سيدي الرئيس
في عيد ميلادك الكام وسبعين
كل سنة وأنت طيب..واحنا مش طيبين
كل سنة وأنت حاكم
واحنا محكومين..واحنا مظلومين..واحنا متهانين

ويا ترى يا حبيب الملايين..فاكرنا ولا احنا خلاص منسيين
فاكر المعتقلين..فاكر الجعانين..فاكر المشردين..فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين

اقلك انا إيه في عيد ميلادك و أهاديك بإيه:
بص عشان اتهرب من الهدية.. هاكتبلك كلمتين قالهم حبيبك" نجم":

زي النهار ده من كام سنه .. مفيش لزوم للعـد والحسبنة
اصل الحكايه عد عمرك يا جدو.. قال يوم مفلس وخمسه سته عكننة
فلس ... فلس ... فلس.. يحيا الفلس والجدعنة

سيبك من نجم و لسانه الطويل .. أنا نفسي أقلك كلمتين رقيقين زي حضرتك .. عارف .. مش لاقية غير كلمات ايليا ابو ماضي - و انا من هواته على فكرة- و أكيد كان كاتب النص ده عشان عارف اني هأهديه لك في عيد ميلادك:

خرج الناس يشترون هدايا العيد للأصدقاء و الأحباب
فتمنيت لو تساعفني الدنيا فاقضي في العيد بعض رغاب
كنت اهدي إذن من الصبر أرطا لا للمنشئين و الكتاب
و الى كل نابغ عبقري أمة أهلها ذوو الباب
و الى كل شاعر عربي سلة من فواكه الألقاب
و الى كل جدة و جدة سلة مشكلة من الأحفاد
على فكرة البيت الأخير أنا لاعبة فيه.. لزوم الهدية

نوال السعداوي هجيت من مصر .. مع الف سلامة

على ذكر النوابغ و العباقرة اللي بيبحثوا عن أمة أهلها "ذوو الباب".. يظهر الست نوال السعداوي لم تتحمل عقلية الأمة الاسلامية .. "فهجيت" من مصر و من أرض العرب و راحت أمريكا و قالت: أنا خسارة في مصر! عموما..سواء خسارة في مصر او خسارة على مصر ..مع الف سلامة و القلب داعيلها.. تخيل الست دي فاكرة ان تطاولها على ربنا نوع من الإبداع اللي مش بيفهمه العقليات التعبانة الي ذيينا..
الدنيا قايمة عليها في مصر علشان مكتبة مدبولى أعدمت نسخ كتابها "استقالة الإله" .. بالذمة ده عنوان محترم.
طبعا مش مجمع البحوث الإسلامية هو اللي اعترض على الكتاب و لا هو اللي طالب بإعدام النسخ أو تغيير العنوان ..هو مفيش غيره "نبيه الوحش"و على فكرة الراجل ده من كثر ما عمل دعاوي حسبة سموه في دوائر "النخب الثقافية" في مصر بأنه "محامي التكفير" .
تخيل إنها اقترحت قراءة سورة الإخلاص بشكل مختلف.. يعني طالبت بتأنيث "هو" إلى "هي"يعني مش عجبها "قل هو الله أحد" و بررت رأيها بأن "الله روح.. والروح مؤنث، لكن اللغة العربية متعصبة للذكورة".
لا حول ولا قوة إلا بالله.. شفت الإبداع يا أنكل..هما سايبنها كده إزاي؟

يكونش علشان في مصر بيحترموا حرية الرأي و الإبداع والتفكير ..
إلا هو في فرق بين التفكير وحرية التكفير.. و لا ده مجرد جناس في اللفظ ليس إلا.

ربنا بيسلط إخوان على أسياد
الغريب بقه إن الحكومة ذات نفسها.. أممت 29 واحد من بتوع الإخوان.. والله
حاجة غريبة .. يا سبحان الله.. ما كنا لسة بنقول- يا أنكل- حرية تفكير و إبداع و رأي ولا حلال على نوال التفكير ؟؟و حرام على الإخوان .
تعرف- يا انكل -أنا مش إخونجية و لا حاجة و حضرتك عارفني ما ليش لا في السياسة و لا الكرة.. لكن بأشعر إن "ربنا بيسلط إخوان على أسياد"
* اه يا انك يا انكل.. شفت حفلة افتتاح الأسياد في ديسمبر اللي فات.. كان نفسي أحضر الحفلة و أشوف بن الأمير حمد و هو طالع على الشعلة بالفرس .. بيقولوا كان منظر رهيب.. و بيقولوا كمان إن قطر كلفت الأسياد- بتاع- 3 مليار ريال.. ده غير اللي المواطن العادي في قطر إتكلفه بسبب الأسياد.. أسعار الإيجارات زادت بتاع 300% .. و حسينا ان الأسياد خلونا عبيد!
* المهم يظهر علشان يصالحوا الشعب و يخففوا من ثقل الأزمات اللي بيعاني منها المواطنين قاموا عملولهم انترنت مجاني في الحدائق العامة و المتنزهات.. طب و الله حاجة جميلة.. ممكن برده أبقه أروح اقعد اكتب في الجنينة و محمود و دانة يلعبوا.
الدموع خلصت

* هو ليه- يا انكل- دايما المسئولين بيُتهموا انهم بيلعبوا بالشعب و بيتلاعبوا بسياسات الدولة .. مش ده برضه افترا عليهم..

حتى لما الحكومة بتعمل أي موقف عدل.. الناس بقت تشك.. تعرف من كام يوم كده اسرائيل اذاعت فيلم عرضت فيه عملية قتل أسرى 67.. تخيل.. الناس شعروا بزل.. مش من اللي عملته إسرائيل .. لا.. من موقف الحكومة في مصر..
لأن وزير الخارجية –الله يمسيه بالخير قال لك: أنا لناقطع علاقتي بإسرائيل عشان فيلم.. برضه بيفهم عنا.. ربنا يكمله بعقله.

تخيل عملوا لقاء مع احد هؤلاء الأسري .. مجرد نقيب .. بس تشوف الدين و العمل والصبر على أصوله.. بص حضرتك أنا مش قادرة أوصف هو قال ايه.. بس أتذكر انه قال: الدموع خلصت و حقنا مش هيجيبه الجيل ده.. لكن أكيد هتجيبه الأجيال التالية..و لم يتعجب من إذاعة إسرائيل لهذا الشريط بعد 40 سنة لأنه شايف انه طبيعي يذييعوا الشريط علشان يقولوا للشعب الاسرائيلي اللي أخد علقة جامدة من حزب الله قي يوليو الماضي.. لا حنا رجالة..

ايه اللي انا عماله اكتبه ده
بالزمة واحدة بتراسل حماها.. تتوهه كده في السياسة والحرية و الديكتاتورية الموزونة و الكلام الفاضي ده..
خللينا في سيرة الولاد أحسن..
تعالى يا انكل عشان تشوف دانة.. على فكرة طلعتلها نغزة في خدها ذيي.. فاوعى بقه تقعد تقللي لا دي شبهي أنا و نقعد نتخانق..
كفاية ان محمود طلع شبهك .. هو حضرتك عايز تقش الولاد كلهم..
يالله. تعالي بقه عشان تشوفهم .. بس هيجننوك يا انكل..
تعرف و انا بأنهي الجواب
سمعت في التلفزيون أغنية " ادم و حنان"

أدم ضم الكون بحنان
ظهر الأخضر في البستان
هما حكاية كل اتنين
كانوا ضحكتينا.. صبحوا أمالنا
و بقوا في عز الضلمة شموعنا
ادم هو و هي حنان
بص .. انا عايزة انهي الجواب من فترة و مش عارفة .. كل شوية الكلام يجيب بعضه . بأحس اني بأكلمك و انا بأكتب .. فطولت كالعادة
أسفة جدا على التطويل.. وسلامي ل حنان .. اقصد سلامي لاحلى تانت في الدنيا و للعيلة كلها .

كل الحب
ابنتك
داليا الحديدي
الدوحة- قطر
صفر 1428 21
11- مارس – 200

الرسالة الثالثة -- "ع اللي جرى .. ع اللي جرى"

Papi:

طبعا حبيبي كلمة قليلة على حضرتك .. و "اشتقتلك و وحشتني" استهلكت قولاً و بصراحة نفسي أبحث لك على كلمات أغلى .. "كلمات ليست كالكلمات"..كلمات " نزارية" في منتقاها..طيب أقول إيه؟ يظهر لابد أن أبحث في المعاني لا في الكلام..
ياااااااااااااااه ..
فاتت أكثر من أربع سنوات على أخر رسالة أرسلتها لك.. و كنت حضرتك وقتها في المستشفى .. و كان وليد- الله يكرمه- يوصلك الرسائل.
بجد .. بجد.. هل كنت تتخيل أن علاقتنا حترسي على شوية رسائل و اتصالات هاتفية.. و زيارة سنوية ..هي دي أخرتها؟
شوف يا بابي .. أنا باحاول اقنع نفسي أن الإتصال الروحاني موجود وأقوى من أي إتصال ..لكن حقيقي مش كفاية.. نفسي أشوف حضرتك" فيس تو فيس".. وجهاً لوجه.. و ألمس بشرتك وأخد حضن كبير و قبلة على جبهتي.

Papi:

بس اما تيجي و أنا احكيلك ع اللي جري
و امسح دموعي في منديلك ع اللي جرى
متغربين احنا
متغربين
تجري السنين و احنا
متغربين
لا حد قال عنا خبر يفرحنا
و لا حد جاب منا كلمة تريحنا

مش عارفة ايه اللي فكرني بكلمات الاغنية دي و انا باكتبلك ..
بصراحة عارفة.. بس يعني ذي ما تقول كده بأستعبط ..
أفتقدك و أفتقد مراسلتك بشدة و أفتقد تقييمك لرسائلي و إعتزازك بها .. وبي .
نفسي أشوفك.. و نفسي أشوف نفسي فيك كما كنت تراني و تصورني ..

يتهيألي .. فقط الأب و الأم يريا الأبناء بشكل مختلف تماما عن أي إنسان .. و يهيأ لي عمرنا ما بنكبر و أنتما بجانبنا .. لكن لما بنبعد عنكما .. ما بنكبرش.. لكن.. لكن بنعجز.. و بنقدم.!

بابي :

أكتب لك "أفتقدك" بعدما بدأت أعي ماهية فقدان البنت لوالدها ...
أكتب لك " وحشتني" بعدما و بالفعل عانيت من الوحشة في غيابك...
بداية أنا أسلم بأن فراقنا عن بعض مقدر وغربتنا حكمة .. و إذا كان البعد و الفراق صعب .. فأنا لست - فقط - راضية بقضاء الله لكن سعيدة به أيضأً..
و حضرتك عارف اني لا افتقدك فقط .. كأب و سند و ظهر و صديق ومربي و محب و حامي و محامي .. وأعتقد انه لو كنت افتقدك لهذه الأسباب فقط .. ده انا أبقى انانية جدا.. و حبي لك يبقى
" براجمتك" جداً..
و لو انك كنت فعلا سند كبير .. لكن حضرتك ربتنا على أن " كفا بالله وكيلا و سندأ" لكن، ألم يسمي سيدنا محمد- عليه الصلاة و السلام - العام الذي فقد فيه السيدة خديجة و عمه بعام الحزن؟ إذن الغربة و البعد و الفراق ممكن أقول عنهم سنين "الحزن".
كش ملك
لكن أحاول التفكير في الحكمة من ابتعادي عن أغلى الناس عندي.. و أكيد في حكم كثيرة لكن أخشى.. أن يكون ربنا بعدك عني كي أستشعر قيمتك أكثر..
تعرف في غيابك فقدت الوزير.. و طقم بيادق الشطرنج كله تحول لعساكر - و للأسف - في معسكر الأعداء..
تحب تعرف إتعملي كام " كش ملك" في غيابك؟!
ياه أول مرة أشعر إن ربنا أوجدك في حياتي لتجعلني ملكة!
طب قل لي .. مش ما أنا كنت مُقدراك جداً و مستشعرة النعمة في وجودك بجانبي إلى درجة كبيرة؟
تكنش الدرجة دي مش كفاية؟!

* على فكرة " كفاية" بقى اسم حركة منشقة ظهرت في مصر .. و بيقولوا كفاية.. عارف لمن؟؟ أنا مش مستجرية أنطقها.. الواحد مش فاهم الناس بتوع " كفاية" دول مش ناويين يجيبوها لبر! أحكيلك إيه و لا ايه..

بس اما تيجي و انا احكيلك ع اللي جري
و امسح دموعي في منديلك ع اللي جرى
متغربين احنا
متغربين
تجري السنين و احنا
جرح السنين
لا حد قال عنا خبر يفرحنا
و لا حد جاب منا كلمة تريحنا

برده الأغنية مش راضية تسيب دماغي

بص حضرتك .. ما تيجي أحكيلك على اللي جرى في الأربع سنين اللي مضت.. واللي مكناش فيها مع بعض .. أحكي لك على قد ما ذاكرتي تسعفني .. أحكي لك على كل شيء علق بهذه الذاكرة المنهكة بما أرهقت من أحمال.. احكيلك ايه و لا ايه؟ نفسي احكي لك و أعرف رايك في كل اللي بيحصل حوالي؟

" نساء أوبرا و نسوان هالة "

*احكي لك عن غزو العراق .. طب ما حضرتك عارف .. أحكي لك عن العلوج .. و لا أحكي لك على التقاتل بين السنة و الشيعة في العراق .. أصلها ناقصة.

*أحكي لك عن صدام لما نحروه ليلة العيد .. بس ايه.. بعض الحكام العرب عملوا حركة تعجبك. كان لهم موقف.. لا موقف بحق و حقيق .. واعترضوا على توقيت الإعدام.. يا ولد!

* احكي لك على اليهود اللي قررواا يهدوا في المسجد الاقصى و بدأوا بباب المغاربة .. و في نفس الوقت العرب من المحيط للخليج بيحضروا لإحتفالات الفالنيتين .

* و لا تيجي أحكي لك عن هالة سرحان .. الدكتورة إستضافت مومسات مصريات وعرضتهن في برنامجها" هالة شو" على قناة روتانا.. و بعدين الناس اكتشفت انهن لا فتيات ليل و لا فتيات عصر و لا حاجة خالص .. و كله "فبركة " و البنات متأجرين ل " هالة شو ".. و طظ .. مش مشكلة سمعة البنات المصريات .. يعني ندفن رأسنا ذي النعام.. و نقول ان ما فيش بغاء قي مصر .. حاشا و كلا.
في مقال عجبني عمل مقارنة بين أوبرا وينفري و هالة سرحان .. الأولى إستضافت أرامل أمريكيات فقدن أزوجهن في 11 سبتمبر.. و قررن السفر إلى أفغانستان لمساعدة المجتمع هناك للقضاء على أسباب الإرهاب .. و هالة إستضافت عاهرات.. و المقال كتبه الصحفي "سيد علي" و سماه " نساء أوبرا و نسوان هالة "

شارون .. نفسه في الدنيا

* أحكيلك عن انتهاء مشكلة هند و احمد ..
* طبعا.. لازم اقلك إن سعاد نصر توفت بعد جرعة التخدير الزائدة اللي أخذتها في العملية التجميلية.. بس اللي ما يتسمى شارون لسة نفسه في الدنيا !!
* خايفة افكرك بخبر العَبَارة اللي غرقت بالناس اللي عليها و ممدوح اسماعيل هرب .. و القطارات في مصر اتحرقت .. و اللي طار فيها رئيس السكة الحديد.. بس وزير المواصلات قاعد.
و أحمد نجاد شغال في النووي .. و البرادعي رفع اسم مصر عاليا و حصل على جائزة نوبل للسلام:) و رازان- ست الكل- مسكت ادارة قناة جديدة.. الف الف مبروك.
مش أصالة حامل!

* لا إبسط .. أقلك خبر حلو.. الاعلام مشغول به من فترة .. مش اصالة حامل!! بس نضال احمدية غير سعيدة بالخبر السعيد.. أما الإعلام فلم يقصر.. بل أولي اهتماماً بالغا بكل ما هو هايف و خصوصاً ب"بهيفا" لأن- ربنا يكون في عونها- بتحضر البومها الجديد.. ربنا معاها .. بتتعب اوي.
* معلش .. خبر وحش تاني .. مي حريري إنفصلت عن زوجها .. يظهر أصابتها عين الحسود بعد إنجابها لإبنتها الجميلة
* و كفارة .. تامر حسني أخذ افراج ..
* و عايزة أطمنك على الرياضة في مصر.. لاعب كرة القدم "حازم إمام" بن "حمادة امام" و د. ماجي الحلواني عميدة كلية الاعلام السابقة "وقع مع نادي الزمالك ب 20 جنيه.. طبعا الرقم وهمي .. يعني ذي ما تقول بيكتبوا أي حاجة .. ذي ما اهل العريس و العروسة بيكتبوا الصداق المسمى بيننا .. يظهر عشان الضرائب.
*و اللمبي افلامه محققة إيرادات اقل من المتوقع.
* أخيراً" شيرين أه يا ليل" تصالحت مع نصر محروس في جلسة مفاوضات عقدها المطرب هاني شاكر في بيته و دفعت شيرين نحو 2 مليون جنيه تعويض لنصر. . 2 مليون !! دي نصرة كبيرة .. صحيح كل إنسان له نصيب من إسمه.. اللهم لا حسد.
* مرتضى منصور طلع من الزمالك.. و في "أزعرينة "حوالين الموضوع.
*المهم يا بابي ..عارف أحمد أدم.. عمل فيلم اسمه" معلش احنا بنتبهدل" جاب واحد شبه جورج بوش و عمال يضربنا بالجزمة!

*حكيتلك إن موبينيل عملت المكالمة بالثانية و عملت كروت شحن أشكال و الوان و"كليك" بتنافسها.
* قلتلك إن كيوتل – شركة الاتصالات القطرية- لسة محتكرة الملعب في قطر و محققة صافي ايرادات السنة دي مليار و 700 الف ريال .. و كله من رغي الشعب و مسيجاته.. و الناس في قطر منتظرة ليلة القدر لتدعي ربنا عشان يخليهم يسمحوا لشركة أخرى تدخل السوق القطري لوقف الاحتكار " الكيوتلي" لسوق الرغي الهاتفي .
* مش البورصة وقعت في مصر و الخليج .. و اللون الاحمر مكتسح الشاشات.

جمال كمل نصف دينه

* قلتلكش إن احمد بن تانت ناهد إتجوز ؟ كان نفسي تكون موجود .. لسة ما فاضلش غير أميرة و شريف.. ربنا يوفقهم .. كمان " تاتي" فاطمة أبو ريدة بنت تانت منى اتجوزت شاب شكله طيوب جدا و مقيمة في لبنان مع جوزها .. أنا حضرت كتب الكتاب فقط لكن في الفرح كنت موجودة في قطر.. بس مامي ووليد و ايمان حضروا الفرح و اخبروني أنه كان فرح صباحي تحفة .. خرافي.
محمود بن عمتى اتجوز من فترة قصيرة .. بس للأسف ماحضرتش .. و رنا سيد الأهل اتجوزت و خلفت ولد .. باتبسط جدا لما اسمع أي خبر جواز .. اصل الجواز في مصر و في غير مصر أصبح مكلف جدا.

* عارف - حضرتك- من كمان ربنا قدره على تكاليف الزواج و يسرهاله من وسع.. افرح بقه.. جمال و خديجة..
أي نعم .. جمال و خديجة .. مش عارف جمال .. بن الريس .. أخيرا فَرَح مصر و كمل نصف دينه.. و ان شاء الله يكمل النصف التاني لما يبقى.. خير خلف لخير سلف.
* بمناسبة الخلفة .. قلتلك ان صلاح بن عمتي خلف أخيراً! يا سبحان الله .. فعلا ان الله مع الصابرين.. بعدة تسع سنوات ربنا رزقه بنوران.. ربنا يخليها له.. حضرتك طبعا عارف إن الخلفة ما بقتش بالساهل في مصر.
*أنا عرفت إن أنكل محمود الحديدي بن عم حضرتك توفى .. طبعا لم أتمكن من حضور العزاء .. كمان انكل عبد القادر سيد الأهل بن عم مامي توفى في رمضان قبل الماضي ..أنا عرفت الخبر في نفس يوم عودتي في اجازة لمصر و عزيت تاني يوم في الزمالك.
برده تانت سامية بنت خالة حضرتك توفت وانكل حسن عابدين كمان .. الله يرحمهم جميعا.. للأسف لم اتمكن من العزاء.. ظروف الغربة تحكم.

* كمان عم طه .. خلاص .. تخيل؟ الراجل ده كنت باشعر إنه من أعمدة البيت.. مش قادرة أنسى منظره بالجلابية المقطعة اللي ما بيرضاش يغيرها مهما جبتله جديد .. و مش قادرة أنسى استمراره في العمل الي ان اقعده المرض .. و كنت أتعجب كيف و هو فقير و مع ذلك يدخن! حضرتك عارف انه كان بيربي أحفاده لأن إبنه مات وترك أطفال؟
الموت صعب اوي يا بابي .. و تخيل.. الحياة كمان!

شعب .. عنده دم

* عايزة اطلع حضرتك من "الموود" الحزايني ده واقلك خبر يشرح .. بعد أزمة اكياس الدم الفاسدة في مصر .. الناس بدأت تقلل التبرع بالدم .. طبعا مشكلة كبيرة.. لا ..إطمئن.. المشكلة إتحلت.. الحكومة مشكورة حلتها.. اخدت من دم عساكر الأمن المركزي و أعطت للمحتاجين..
أدي اللي كان ناقص .. لا كنا هنبقى شعب معندوش دم مثلا.. صحيح ما فيش وزير و لا وكيل وزارة ولا حتى مدير عام.. جابوه يتبرع .. بس بتوع الأمن المركزي .. شباب زي الفل..
سدوا و عملوا الواجب وزيادة.. وعلى رأي اخوانا في قطر" ما جسروا".

*أحكيلك عن الغلاء في الدول العربية – كيلو الخيار وصل الصيف الماضي في قطر و الامارات.. ل 8 ريال للكيلو..أي حوالي 14 جنيه و الفلفل و الكوسة ب 7ريال.. و البطاطس ب 4 ريال و نصف للكيلو أما الطماطم فوصلت 4 ريال و الطماطم "الشيري" الصغيرة ب 28 ريال الكيلو أما الجزر ب 5 ريال و الخوخ و البرقوق ب 25 ر يال الكيلو .. والعنب من 16 الي 28 ريال للكيلو و ربطة الجرجيرأو البقدونس بريال يعني بجنيه و 65 قرش.. ولو من لبنان ب 3 ريال.. أما الفاصوليا ب10 ريال الكيلو.
كيلو الجبنة رومي ب27 ريال الكيلو يعني حوالي 43 جنيه و مش رومي قديم .
*تحب اديك فكرة عن اسعار الأدوية؟.. بص حضرتك.. هو شراء الأدوية بقه يجيب المرض للناس.. القطرة بتاعت العين ب 27 ريال.. و البانادول بحوالي عشرين ريال للعلبة.

* أغيظ حضرتك و اقلك اسعار الكوافيرات في الخليج ايه.. لو واحدة عايزة تروح تسرح شعرها بالسيشوار .. هتدفع 80 ريال علشان شوية الهواء الساخن .. و 120 ريال لو شعرها طويل..
و قوائم القص والحف و التمليس تملأ الجرائد و بأسعار مغرية تبدأ من 80 ريال و حضرتك طالع .. يا بلاش.. طبعاً النتيجة هي إن ولا واحدة مغتربة بتضرب المشط في شعرها .. وبشوية مبالغة .. كله عامل دماغ و ممشيها فرجة على الفضائيات.
آخر أجازة ليا في مصر.. شارية كيلو الثوم ب 6 جنيه تخيل؟ و كيلو اللحمة في مصر وصل 60 جنيه .. الفرخاية بقت ب15 و 20 جنيه و بتتباع بأنفلونزتها!
ما عدش الاهالي بيتحايلوا على أولادهم علشان يشربوا اللبن.. كيلو الحليب ب 4 جنيه .. و الأغنياء برده طلعان عينهم لأن جرام الذهب أصبح ب 160 جنيه .

* أكلمك عن إرتفاع اسعار الإيجارات في قطر والإمارات وأقلك على الموظفين اللي بدأوا يرحلوا أهلهم و يعيشوا عيشة العزاب و يسيبوا أولادهم و زوجاتهم من أول و جديد و هما سنهم داخل على الخمسين و الستين.
* دعاء الحديدي بنت عمي أنكل كامل .. مقيمة مع جوزها في الإمارات.. و زوجها شغله في دبي .. لكن اضطروا يسكنوا في الشارقة لأن الأسعار في دبي نار.. و زوجها يذهب لعمله كل يوم في ساعتين و نصف رايح و مثلهم راجع .. و بتقللي اقل و اصغر شقة في دبي ايجارها السنوي لا يقل عن 45 الف ريال سنوياً.. إقسم على 12 .. يعني حوالي 4 الاف ريال شهريا..
يا بلاش.
* لكن تعرف حضرتك.. أنا لسة شايفة خبر في جريدة "الوطن" القطرية أمس يصرح على لسان "السهلاوي" إنه بيتوقع خفض الإيجارات بشكل ملموس خلال العام الجاري.
ملحوظة: السهلاوي .. إسم سهل و مريح لمدير إدارة حماية المستهلك و المنوط بها تسهيل الحياة و رفع الأعباء عن المواطنين و حمايتهم من غول إرتفاع الأسعار.. مش قلت لحضرتك .. كل إنسان له نصيب من إسمه.

* أحكيلك على " أحمد علي" – ده صحفي مشهور في قطر .. يفكرك بموسى صبري - ده ماسك اليومين دول في "وضاح خنفر" مدير قناة الجزيرة.. و مهلهله و حالف أيمانات و رافع شعار " يا أفنشه .. يا يفنشني.. لا تفاوض .. لا تنازل .. لا تفريط في حقوق القطريين" و اخدها مسألة مبدأ.. و فاقعه كل أسبوع مقال صفحة و نص مش تابلويد .. لا .. 8 أعمدة محترمة.
وبعدين أحمد على مقالاته بتطلع عين العاملين في الإخراج الصحفي، مجننهم يا بابي.. كل سطر عامله فنط .. لما يصرخ يكبره و لما يهدى يصغره .. و شوية يحط خط تحت الكلام .. بس فعلا مقالات سكر.
المهم إن وضاح.. ولا راضي يرد و سايبه للغيظ يفتك به.. ما أصل" صحفي على صحفي ما يلفش" مع ان الراجل كل قصده يدافع عن أبناء بلده ويعرف ليه القطريين أصبحوا جالية في قناة الجزيرة.. و لماذا لا يظهرون فيها ليأخذوا فرصتهم كنظرائهم من غير القطريين. . هو عايز القطريين يتم تدريبهم و يبقوا في نفس مستوى مقدمي البرامج اللي بيتم استيرادهم من الدول العربية. .
تفتكر حضرتك هيجي اليوم و نلاقي " أحمد علي.. مصري" بيستقتل كده و مسلط لسانه و جريدته و حاله و محتاله عشان يدافع عن حقوق المصريين .. و لا المصريين هيفضلوا طول عمرهم مواطنين من الدرجة السبع تاشر في بلادهم .

الليوة روي عطش الجماهير

Papi

* كنت هانسي .. مش المنتخب " الليوة" حقق النصر العظيم.. و روى عطش الجماهير ..
نم مرتاح البال يا والدي العزيز .. فقد حقق المنتخب الاماراتي الباسل انجازاً سطره بكعوب قدميه على الواح التاريخ الرياضي و حصل لأول مرة على كأس خليجي 18.. و كسب الماتش واحد صفر.
حضرتك عارف على الواحد صفر .. أخذوا كام؟ عشان بس تنام قرير العين و تنبسط و تعرف إن في أمل .. و المستقبل مبشر.
* كل لاعب في فريق المنتخب الاماراتي لكرة القدم حصل على فيلا هدية من سمو الشيخ محمد بن راشد بن مكتوم حاكم امارة دبي .. -اللهم أوعدنا يا رب-
*وسمو الشيخ خليفة بن زايد منح كل لاعب نصف مليون ريال خالية من الضرائب والمكوس و الجبايات والذي منه.
* حاكم الشارقة اعطي المنتخب كله عشرة ملاين يقسموها مع بعض .. كما منح سموه مبلغ مليوني ريال لفريق كرة التنس .. يظهر كانوا كسبوا برده ماتش .

papi

*مش كنت تخللي وليد يطلع لعيب .. و بعدين ما كان نفسه يطلع بتاع كرة و لا أي لعبة .. و حضرتك اللي وقفت في طريقه و قلتله المذاكرة و الجدية و العمل و المستقبل .. و الكلام اللي ما جابش همه ..الواحد يقول ايه بس .. مش لو كان حتى لعب احتياطي حتى كان أحسن له.. عموما كلها أرزاق و قسمة و نصيب.

مش هيكل استأذن .. في الإنصراف؟!

نسيت أقل لك أن محمد حسنين هيكل إستأذن في الإنصراف .. آه بس الخبر له بقية..
هيكل رجع تاااااااني .. بس المرة دي دخل من باب الفضائيات.. و من غير إستئذان..
هو كان كتب "حتة دين" مقال بتاع صفحتين طوال عراض.. و قال كلام مؤثر جدا و مقنع .. و اتكلم عن ضرورات معينة بحكم السن و غيره.. مفاداها أن الإنسان حينما يصل للثمانين لابد أن يحترم عقلية القارئ و كلام كبير و موزون جداً.. بعض القراء قال ده بيرمي كلام لجيرانه الرؤساء اللي مطلوب منهم يختشوا و يعرفوا إن سنهم لا يسمح لهم بمواصله مهامهم الرئاسية..
المهم هو نشر المقال من هنا و ما فيش جريدة - بابالغ- ما نشرتوش و الناس على النت يمرروه و قصة و رواية .. هيكل اعتزل يا رجالة.. هيكل استأذن بالإنصراف يا ناس.. و بعدها هوب.. رجع و دخل بدون استئذان من باب قناة الجزيرة .. مع ان العمر ما بيرجعش!

*احكيلك على البعبع اللي راعب الناس اليومين دول.. عارف مين.. مرة يقلك التوربيني و مرة يقولوا سفاح المعادي و على طول ماسكين في الإخوان.. و بعدين ما عادي.. ما أي جماعة او حركة بتتمنى انها تمسك الحكم.. ايه المشكلة يعني؟! و طبعا عمال التلفزيون يلم في العلمانيين الكبار من أمثال مراد وهبة و يديهم مساحة و وقت يهاجموا في الاخوان المسلمين.
*احكيلك عن تسونامي و ملايين الضحايا و لا أحكيلك على الأعاصير في أمريكا .. و ما حدش قدر يكتم شماته .

* مش "حكيم" أحيا حفل توزيع جوائز نوبل و عمل الخمسة بتوعه هناك و رفع اسم مصر عالياُ خفاقاً منادياً بالسلام" إس إس إس لام عليكم"
* عارف بقه حصل ايه في رمضان اللي فات.. محمود سعد استضاف ممدوح الليثي و مفيد فوزي و اتخنقوا مع بعض .. بسبب السندريلا !
يعني حبكت المشاجرات في الشهر الفضيل! مش عيب.
* أحكيلك عن "البويات" في الخليج و خصوصا في البحرين.. دول بنات بيقصوا شعرهم "الا جرسون" و عاملين قبضايات.. أقول ايه بس.. مش قادرة أعلق.
* مش طلعت السادات اعتقل.. ربنا يفك زنقته.

روتانا تقضي على البطالة بطريقة روتينية

* شفت حضرتك روتانا و فروعها .. روتانا سينما و روتانا العامة و روتانا موسيقى و روتانا كليب و روتانا زمان و روتانا طرب و روتانا خليجية.. و هي بذلك تساهم في القضاء على البطالة في الوطن العربي بطريقة .."روتينية"!

ناس كتير بيفكروا يشتغلوا في الغناء و الرقص وتقديم البرامج .. و اللي ما عندوش لوك حلو و طلة تلفزيونية جذابة.. بيشتغل في الإعداد أو الإخراج او التأليف أو يحول على الإذاعة.

جويل عاملة سحر ابيض

* اه يا بابي .. نسيت أحكي لك عن جويل ماردينيان .. بنت تحس إنها طيبة جداً و نفسها تساعد الناس بطريقتها .. بتقدم برنامج رهيييييييييييييب إسمه "بالصراحة أحلى" على ال "أم بي سي" .. عارف المثل اللي بيقلك.. لبس البوصة تبقة عروسة.. أهو جويل بتعمل سحر أبيض .. وعاملة شغل .. الله ينور .. للرجالة و الستات ..هي يعني بتعملهم "عَمرة "

بتأيفهم و تمنجههم و توضبهم و تأفلطهم و تعملهم ديكوريشن .. و تغير قطع الغيار بتاعهم .. يعني اللي عايزة مناخير جديدة تعملها عملية .. اللي عايزة تكبر شفايفها .. ما فيش مشاكل .. و اللي نفسها تنفخ خدودها زي نانسي.. برده ممكن و اللي نفسها ترفع و تعلي جفنها أو تظبط أردافها.. أو تكبر .. مش قادرة أستفيض .. المهم حضرتك كلك مفهومية.. و كله مع جويل قابل للتجديد.

و طبعاً ما ننساش الإبتسامة الساحرة التي لا تكتمل اللي بالتلبيسة الصناعية على الأسنان لتعطي بياضاً براقاً و في الآخر تقلك: دلوقتي مش فاضل غير أني أحط الرموش العيريه و الأضافير العيريه و الاكستنشن العيريه و العدسات العيريه و المكياج و بعدين نشوف " حلاوتهم" باللوك لجديد.

نصر الله خرب البينة التحتية

* أحكيلك على حسن نصر الله الراجل.. آه و الله ده تقدر تقول عليه الراجل.. المهم هو و حزب الله ضربوا إسرائيل ُعلق .. ما خدهاش حمار في مطلع .. و تخيل بدل لما يشكروه .. و يعملوه سوبر ستار .. و ليد جمبلاط قال لك: ده خرب البنية التحتية بتاعت لبنان.. و لحود بيحذر من التلاعب بمعالم" الخط الأزرق".. طب و الله اتقال كده ..

أصل نصر الله شيعي .. و اديها تغذية في الكراهية بين المذاهب وأسفن بين المسلمين .. وقلبوا النصر .. حولوه مخاطر الشيعة في المنطقة.. و إيران تخطط لبسط سيطرتها والخطر الإيراني و كلام فخيم جداً.. احنا مش اده.. برضه هما يفهموه اكتر مننا ..
بس اللي مش فاهمينه إنه لما إسرائيل و أمريكا يهدوا في العراق هد .. تبقى أمريكا حلوة و ضرورة حتمية لأمن العراق في المرحلة الراهنة كي لا تنهارالبلد بسبب غياب الأمن .. و ما حدش يجيب سيرة البنية التحتية للعراق!

* أحكي لك على كوندي .. الست دي مبهدلة في العرب آخر بهدلة و مطلعة عينهم هي و اللي مشغلها بوش .. قوم نموت احنا من الغيظ لا سمح الله؟ لا طبعا .. مخرج مصري مغمور عمل فيلم .. جاب فيه ممثلة مصرية سمارها غامق .. و شبه كونداليزا .. و خلى الممثل ينتقم منها شر انتقام.. الفيلم أجازته الرقابة.. و عرض في الخارج.. و المخرج بيقول أنه عند عرض فيلمه في الخارج.. قال لهم: أنا كنت بافكر أعمل فيلم رومانسي لكن لما شفت اللي بتعملوه في العراق .. قررت اعمل فيلم سياسي كوميدي أسود.

الناس ما بقاش عندها طأطان

* أحكيلك على إي و لا على ايه.. مش نص أصحابي إطلقوا و الباقي قاعد يحضر في ورقه و بيفكر يخلع .. ما حدش بقى يستحمل حد.. الناس ما بقاش عندها طأطان ..

* اقلك على الرجالة الي بقت تتفنن في العكننة على مراتتها لغاية ما يقولن" حقي برقابتي" و يخلعن بعد لما يتنازلن عن كافة شيء .. و يصبحن عازيرو .. و يطلعوا تلاتة عين أهلهن و يرجعن كل الهدايا او أي حاجة كانوا جايبنها لهن .. و يبيعوهن ذهبهن و يبددوا عفشهن .. و لو كان في أي حاجة وارثينها و لا يحتكمن على حاجة .. ينضفوهن غسيل و مكواة و عصر و ينفضوهن تماما و يشفطوهن شفط ..هن و أهلهن .. و بعدين .. شلوت كبير.. و اصرفي انت بقه على عيالكن.

*أحكي لحضرت على واحدة صحبتي أختها كانت مخطوبة لواحد من الشبان الغلابة.. اللي طبعا مش قادر على مصاريف الجواز.. هو مدرس بياخد أجرته بالحصة .. وطبعاً مش قادر حتى على مصاريف الخطوبة.. و لا يحاول زيارة خطيبته و ممشيها رنات .. وبعدين العروسة ماتت فجأة!! كده .. فجأة.. من دون مقدمات ..

من غير ما يجيلها حتى صداع .. من غير ما تفرح و تلبس فستان الفرح..
من غير ما تعيش يوم فرح و لا أيام طرح و لا شهر عسل و لا سنين بصل ..

من غير ما تعاني من حماة عقربة قرشانة أو أخت جوز حيزبون دندبيس على رأي أحمد بهجت..
من غير ما تشوف غمة نفس الحمل و لا الآم الطلق و لا فرحة السبوع ..
من غير ما تتعك في المطبخ و لا تاخد وردة و شوكولا في الفالنتين..
من غير ما تِسَمع لأولادها جدول الضرب.. و تعنفهم لو غلطوا .. و تسعدلهم لو نجحوا..
و تزغرد في فرحهم و تشيل احفادها.

بس اما تيجي و انا احكيلك ع االلي جري
و امسح دموعي في منديلك ع اللي جرى
متغربين احنا
متغربين
تجري السنين و احنا
جرح السنين
لا حد قال عنا خبر يفرحنا
و لا حد جاب منا كلمة تريحنا

كان حيريحني جدا و كان حيفرق معايا كتير اني اسمع رايك في كل اللي فات و اللي هيجي..
المصائب كانت معك تهون.. بصراحة شديدة أنا لم أُحَب في هذه الدنيا من بني أدم مثلما أحببتني..أفتقد طريقة حبك لي .. أفتقد خوفك علي و قلقك المبالغ فيه اللي كنت باشتكي منه و كنت اراه زيادة و " أووفر "
Over
آل أووفر آل؟ ده الواحد اليومين دول بيتنشأ على حد يسأل فيه ..

تعرف انا ما كنتش باحتاج ازعل .. لأنك كنت بتزعل لي.. و لا كنت احتاج اخد حقي ..
أسكت .. مش أنا كنت مطلعة على نفسي إني متسامحة.. لكن طلع انك كنت دائما تجيب لي حقي .. فهتقهر ليه و لا اضايق ليه ؟ ما في حد بيتضايق لي و بيحميني...

ده حضرتك كنت بتفرح لي مليون مرة اكتر ما كنت بافرح لنفسي .. و تعرف.. حتى وانت نايم على فراش المرض و تعاني من 90% عجز في جسمك .. كان الناس تعمل لك حساب ذي ما كان الجن بيعمل حساب لسيدنا سليمان و هو متهالك و ماسك منسأته.. تعرف- أعتذر عن المقارنة لو فيها تجاوز واستغفر الله كمان- لكن هو تشبيه للتوضيح اكثر منه مقارنة ..

انا مرة سمعت عن بنت يتيمة .. كانت تكذب على أصحابها في الجامعة و تدعي أن أهلها صعب جداً و مانعينها من التأخر و الخروج و الدخول ولما تزور صديقاتها تمشي بسرعة متحججة بالخوف ً من والدها الصعب.. وبعدين عرفنا بعدها.. أن لا والد و لا يحزنون .. وكله اختلاقات لمناخ أسري وهمي!

مش عارفة كنت حكيتلك الموضوع ده ولا.. لأ.. بس أتذكر انك لما كنت تأتي تأخذني من الجامعة.. كنت أجد عشرين .. ثلاثين واحدة – الرقم مبالغ فيه شويه – تقل لي: باباكي جه يا داليا والاقيهم هما اللي يتخضوا.
ومرة كنت خارجة مع ماجدة و رايحين ملحق هليتون رمسيس.. و ماجدة شافتك ماشي بالعربية واحنا رايحيين.. لقيتها هي اللي قلبها كان هيقف.. بتقللي : أنكل يا داليا .. أنكل!
قلتلها: اجمدي و أمشي عدل و ما تبينيش انك مرعوبة كدة.. ما احنا مستأذنين ..

كشف هيئة.. ما لوش لازمة

عارف .. جديتك كانت تخض .. بس برده سكر .. حتى ماجدة وإيمان لما زارونا و قابلوك عن قرب.. حبوك جداً.. و ما بقوش يخافوا منك.
عبير بدوي بقه اللي حكاية .. أنا فاكرة اني طلبت منك مرة اذن للخروج معها و كنت لسة متعرفة عليها في الجامعة.. و بعدين قلت لي:" ماتخليها في النادي علشان تتعرف عليها.. و يا ريت اهللها يكونوا موجودين و نتعرف عليهم.."
فطبعا أنا اتضايقت علشان عرفت انك عايز تعمل كشف هيئة على البنت .. و قلتلك: هي أهلها مقيمين في السعودية.. و طبعا قعدت تسأل باباها بيشتغل ايه؟ و بلدهم ايه؟ و مامتها ست بيت ولا بتعمل؟ و أسئلتك بصراحة كانت تنرفز! و كنت اأقل لك: و أنا مالي .. باباها بيشتغل و لا عاطل.. لأني بصراحة كنت أتكسف جدا أني لما اصاحب واحدة .. أقوم أسأل عن أصلها و فصلها وأهلها .
المهم وصلت النادي الصبح في الموعد و أنا كنت أعطتها فكرة أن حضرتك ستكون موجود و هتقابلها.. فالمهم أول ما شفتها .. لقيت المكياج بتاعها زيادة جدا و فاقع .. فقلت لها :ايه اللي أنت عملاه في وشك ده.. مش يا بنتي قلت لك أنه هيقابلك .. ايه لزمته الدوشة اللي انتي عاملاها في شكلك النهاردة.. هنروح في داهية كده..
قالت لي: أصل النور كان مقطوع و حطيت المكياج ( بالويم ) في الضلمة.
و طبعا ما كانش في وقت تروح تمسح مكياجها .. فالبنت لبست نضارة شمس أخفت نص وجهها .. وفضلت طول الجلسة موطية راسها.. فالنصف الثاني من وجهها اتغطي و ما كانش باين حاجة من المكياج خالص.
المهم أنا موصياها ان الكلام يبقى في حدود و نظام" قصري و عايزين نخلص".. و هي أصلا البنت خجولة جدا.. و بتقصر .. فقعدت مع حضرتك ما بتفتحش بقها .. غير" فعلا يا أنكل .. مظبوط يا عمو .. أشكر حضرتك.. مرسي خالص .. دي فرصة سعيدة جداً.. و حاجات من دي...."
و حضرتك قلت لي في آخر الجلسة" البنت مهذبة جدا وقاعدة على طول وشها في الارض.. مع انك قلت لي انك كنت عارف انها كانت بتحاول إخفاء المكياج.

و الله افتقد الآن انسان مثلك يخاف علي و يختار لي أصدقائي و أفتقد نظرتك في تقدير الناس..

أنا عمالة أكرر نفسي.. بس طب أقول ايه؟ ..

ما أنا فعلاً أفتقد نظامك السويسري .. وجديتك الألمانية و شياكتك الفرنسية و ألاطك الإنجليزية و شهامتك المصرية..

* أفتقد طريقة إفاقتنا بالنداء من غرفتك ثم فرضك علينا لعب الرياضة صباحاً - أقصد فجراً- ثم توضيب البيت في السريع و سماع إذاعة لندن في الصباح في البيت .. و راديو "مونتكارلو" في السيارة و " مع اميجو حكمت وهبة".
أفتقد طريقة قيادتك السريعة و أنت ترتدي قفازات تكشف عقلات أصابعك.
*أفتقدك وأنت تنادي عم طه كي يشتري الطلبات للفطار قبل شروق الشمس وإذا لم يسمع، أطلقت رصاصة صيد في الهواء، فيصحوالرجل مذعورا فاقد الوعي و قاطع النفس .
*افتقد طلبك لي عمل كوب شاي بالقرنفل صباحاً و" ارلجراي" مساء.
*افتقد احترامك للمواعيد بالثانية.. لكن بصراحة كنت باتنرفز لما تقول للسائق: إيه يا مستر هلف.. إتأخرت ليه؟ مش قلت لك تبقى عندي الساعة 5 و ثمان دقائق.
ما تقول خمسة .. أو خمسة وربع .. ايه لزمته الكسر .. الواحد ما كانش عنده إحساس بقيمة الزمن و أهمية الوقت.. تعرف و الله -الآن- أعرف قيمة الثانية.
*أفتقد اهتمامك بالرياضة .. و لو أني أحاول متابعتها قدر الإمكان.. وافتقد صورتك وأنت بتلعب إسكواش و ماسك المضرب" الدانلوب" اللي اخذناه منك أنا ووليد.. ومشهد ذهابنا للنادي بالتريننج سوت زمان.. لا يفارق خيالي .

* افتقد حرصك على متابعة تنظيف سيارتك بنفسك حتى لو في حد بيساعد حضرتك.. لازم تكون واقف على ايده.. و في حياتي عمري ما شفت عربية.. الموتور بتاعها في نفس نظافة الصالون.. العربية كانت فورد ذهبي .. و الموتور نفس اللون .. لما كنت تفتح الكابوت .. كنت باشوفه بيلمع زي الشمس! شعاع:)
بصراحة كنت ايامها باشوف اهتمامك ده – ما فيناش من زعل – حفلطة!!

عالية و دانة.. طلعوا شبهي

*أفتقد اهتمامك بالزرع و النباتات في البيت.. و حنيتك على النباتات.. لكن حقيقي.. كنا بنغير منها جداً.. فاكر" سارة "؟
أنا كنت أيامها باتكسف أن حضرتك مسمي النباتات في البيت بأسماء ناس .. و باتكسف اكتر إنك كنت بتتكلم معهم و تصبح عليهم علشن نفسيتهم تبقى حلوة و يزهزهوا وينبسطوا..

يعني كنت شايفة انك تركز في سعادتنا ونفسيتنا إحنا أحسن..
تعرف.. النهاردة البيت ما فيهوش زرع و لا نباتات خالص.

لكن ما تزعلش .. البيت في حاجات احلى .. فيه عمر و عاليا.. و محمود و دانة .. على فكرة.. كل اللي بيشوفوا عاليا.. يقولوا أنها نسخة مني .. حتى ايمان تقل لي: يا داليا دي شبهك خالص.. و لسة واصلني رسالة من وليد.. يقول لي عاليا بقت داليا الثانية .. بتهيأ لي أنهم يجاملوني .. لكن أنا سعيدة اني تاركة سفيرة لي تمثلني و تفكركم بي في مصر .. و كمان دانة كل اللي يشوفها يقول لي دي شبهك جدا .. و أنا باطير من الفرحة ..

* أفتقد قيمتي في دنيتك .. أفتقد صورتي في عيونك و أفتقد تقديرك لي و لا أعرف إن كنت ستصدق هذه .. فأنا أفتقد - حتى- توبيخك و تعنيفك لي حتى القاسي منه.. مش نزعة ماسوشية .. لكن ذي ما بيقول جاهين:" الشخطة اللي تعلم و ما تهينش الكرامة"
أفتقدك مشورتك و نصائحك الي كنت شايفاها أوامر ديكتاتورية..
أفتقد لهجة الأمر العسكري التي طالما تزمرت منها صغيرة و تمردت عليها مراهقة و توائمت معها شابة.. واشتقت لها و أنا أم؟

*إعدلي السرير كويبس و شدي الملاية مظبوط و إديني تمام"
يا ربي ! الراجل ده فاكرني العسكري بتاعه!!!
*ادامك ساعة لحفظ 3 أبواب و هاسمعهم لك.
" في سري" و ماله بسيطة .. ما الباب مكون من 3 فصول و كل فصل مكون من بتاع عشرين صفحة.. انا أحسن أذاكر مع مامي :)
* بصى أنتي مش فاهمة الناس خالص و عايشة في الوهم .. بصراحة،عندك حق و إلى الأن!!
* أنت قلبتيها قهوة.. دي أوضة دي !.. كاكاو و سندتويتشات و كتب و تلفزيون ووكمان وكمبيوتر و كله في وقت واحد.. يا بنتي لما تاكلي ركزي في الأكل و لما تذاكري ركزي في المذاكرة و لما تقرائي ركزي في القراءة و لما تتفسحي ركزي في الفسحة و ما تفكريش في حاجتين في وقت واحد ..
تخيل إلى الأن ما ليش في موضوع التركيز ده.. و عمالة أعطي لنفسي أعذار.

أنا مش هأصلح .. أنا مش هاعالج

*حنيناكي علينا يا داليا في المصاريف.. إرحمي.
* إطفي المروحة.. هيجيلك سل.
* إبعدي عن التلفزيون .. هتتعمي.
* إيه الدوشة و الهيصة اللي أنتي لابساها دي؟!
* إفردي ظهرط هيطلعلك سنم!
* ذاكري.. انتي ما ذكرتيش ببصلة النهاردة.
* أما نشوف أخرتك إيه.
* ها..عملتي ايه في الامتحان .. هنشوف ؟
* لو سقطي .. هاجزك!
* فرحانة اوي يا ستي إنك ناجحة على الحركرك في" الجيومتري " الهندسة!
* أعدلي الشراشيب بتاعت السجادة كويس..( أنا في حياتي ما شفتش حد عامل مشط و فرشة للسجاجيد)!
* لما أكل معاك و أحب اغلس عليك أنا و وليد .. فنشطب على طبقك بسرعة.. فتقول: هو أنا باكل مع مكن:)
* شيلي الهباب اللي حاطاه في وشك ده !
* ما فيش نزول باللبس ده.. الللللللللا.. أنتي بتفكري تعملي الفوازير السنة دي!
* استنوا عليا .. هافضالكوا و اوريكوا.
* في التليفون لما تكون نبطشي : لو ما سمعتيش كلام مامي .. هاجيلك.
* إسمعي.. فكريني .. أنتي ليكي عندي علقة!
* انتي ممبعجة كده ليه؟ متأزمة نفسياً و لا ايه؟ أجيبلك جرانيتة .. أجيبلك دندورمة!!!!
* طلعي ايدك من جيبك وانتي بتكلميني.
* لو نتيجتك جت زفت .. هاعاملك معاملة الزنوج!
* تدافعيني رهان .. الرهان حرام يا بابي !
* مش عايز اسمع صوت
* اطفي الهباب ده و نامي
* شيلي الاصة دي من على وشك لحسن اقصلك شعرك نمرة3.
* هاوقفك للصبح حصة ادب.. لكن .. كنت بتلين بعد عشر دقائق و أصعب عليك.
* كلي بالشوكة و السكينة و ما تربعيش إيدك على السفرة
* لما تعجبك حاجة تقول: ده شيء ما عظيم!
* لما حد يكسفني و أرجع بخفى حنين تقللي" أسد علي و في الحروب نعامة"
* اخشى ما اخشاه .. انك تضيعي وقتك و ما تجبيش مجموع عدل
* انا مش هاصلح .. انا مش هاعالج
* داليا .. أرجوكي.. حنيناكي علينا .. كل ما تمسكي حاجة تتكسر.. يا بنتي ده يظهرغصب عنك .. ايدك فيها الخراب!
* افردي ظهرك و أرفعي راسك.. شدي نفسك..
* ما تطاطأيش صوابعك..
* ما تهزيش رجلك..
* رجعي الكرسي مكانه، بعد لما تقومي.
* املي ازايز المياه.
* اللي بتاكليه وز وز.. هيطلع عليكي بط بط.
* انا لما انادي .. عايز ابص الايكي ادامي فوراً!
* " قسماً عظماً ".. يا ستار كانت من أكثر الجمل المرعبة .. و ربما أكون ناسية أسباب الأيمانات.. لكن فاكرة جداً .. إنها كانت معظمة ومغلظة للتعذير!
* إنت بتبرطمي بتقولي ايه؟
* إنت بتهوبصي معايا..
* أنت عايزة تبقي ذيي؟!
* بعد لما تقري الجرنال.. طبقيه.
* عند كل إمتحان و في أي مقابلة عمل و في كل موقف من مواقف الحياة أتذكر حواري معك و أنا بعد صغيرة العب في مراجيح النادي الأهلي
:تعالى مرجحني يا بابي
:لا، مرجحي نفسك
:لا تعالى زقني
:خلاص انا هاديكي أول زقة .. و بعدها أنتى توريني داليا الحديدي هتعرف تتمرجح لوحدها إذاي.. يا الله يا داليا.. واحد اتنين تلاتة.. عومي .. عومي كويس.. أجمد يا داليا .. اكتر يا داليا .. اطلعي لفوق يا داليا .. طيري يا داليا.. يا الله .. انتي تقدري تلفي المرجيحة .. ما تخافيش.. جامد.. إجمدي.
: خليك معايا يا بابي .. كل الأولاد.. باباهم بيمرجحوهم و يزقوهم
:لا بصي حواليكي كويس .. مش كل الأولاد معاهم بابي و مامي .. و مع ذلك بيعرفوا يتمرجحوا لوحدهم و يعوموا كويس .. و بعدين أنا بكرة أسافر و بيكون عندي نبطشية و باغيب عنك فترة و عايزك تعرفي تتمرجحي لوحدك سواء كنت معك أو كنت غايب عنك.

*امشي في الشارع مكشرة و خطوتك ذي العسكري..
بصراحة الجملة دي كانت بتنرفزني و كنت بأقول في نفسي .. طب هو ما سمعش إن الإبتسامة صدقة..
تخيل حضرتك ..عمري ما فهمت و لا إستوعبت و لا إقتنعت بموضوع المشي" المبوز " و الخطوة العسكرية الا من سنة واحدة .. كنت قاعدة في كافيه " لو نوتر" هنا في الدوحة .. و بافطر مع محمود و بعدين المكان كان مزدحم فطلب مني مديرالكافيه أن تنضم لي فتاة نظرا لعدم وجود طاولات.. و لأن البنت كانت لوحدها.. فلم أمانع .. وجلست معي ووجدتها مغربية و تعيش بدون أهلها في قطر .. و تخيل بتشتغل ايه؟ دي طلعت " نادلة" يعني " ويترس" أو جرسونة" .. لا و الأغرب و يتهيألي مش هتصدق.. البنت والدها ذي حضرتك .. طيار .. تخيل!! و كمان خريجة أداب .. أقصد كلية الأداب.. بس فضلت تشتغل في واحد من سلسة مطاعم " شيليز" هنا في قطر.. بصراحة اتكسفت أسالها يعني طب كيف و هي بنت ناس.. و والدها طيار و هي خريجة كلية محترمة و تعمل جرسونة؟!

المهم الكلام جاب بعضه و من غير ما أسأل.. البنت كانت متأزمة نفسياً وعمالة تفضفض..
وسبب ضيقها ان مديرها عايز" يفنشها "
فقلتلها: ما يمكن ده احسن و ربنا يوفقك بعد كده في وظيفة أفضل .. و بعدين هيجيلك الضغط و قلبك يقف عالشان وظيفة جرسونة.. على إيه طظ ! طبعا الشغل مش عيب ابداً بس حتى - مادياً -- ان شاء الله تجدي وظيفة براتب أكبر.
قالتلي: لا مش طظ .. هو مش مشكلة راتب .. ده ان باخد كلام فاضي .. ما يجيش الفين ريال ( نحو 3,650جنيها).. بس دخلي أكبر من المدير و هو ده اللي مضايقه مني . لأني بأحصل أكبر تيبس" بقشيش" في "شيليز"
بصراحة هو الفضول وحش .. و حاولت أمسك نفسي عشان ما أسألش .. بس ما قدرتش.. فسألتها و خبث الأطفال في عيني :هو يعني أول عن أخر هتخدي بقشيش كام؟ هو في حد بيدفع بقشيش أصلاً .. طب ما الفاتورة غالبا ً.. تشمل الخدمة.
عارف قالتلي ايه؟ جمد اعصابك.. أنا عارفة ان الإستفزاز وحش..لكن مش قصدي والله .. و كلها أرزاق- عموما البنت قالتلي: هو صحيح مرتبي الفين أساسي .. بس بيعطوني سكن .. و بأحصل بقشيش حوالي من 8 إلى 9 الآف ريال شهرياً.

طبعا رأسي لفت زي" فيدو ديدو " بتاع الإعلان .. يعني عارف حضرتك.. انبهرت بالمبلغ.. لكن فكرت إزاي بقشيش يصل في الشهر إلى 8 ألآف ريال؟! فالبنت - مشكورة – وضحتلي إن هناك زبائن يدفعون بقشيش يتراوح في العادي ما بين 20 إلى 100 ريال .. لكن في ناس تانية بيسموهم العملاء الكرام .. فدول يا والدي العزيز بيدفعوا بالدولار!!

و حكت لي البنت المغربية أنها كانت تعمل في فرع " شيليز " بأحد القواعد الأمريكية في قطر.. باين في السيلية أو" العديد " مش فاكرة .. وطبعاً في مجمع مطاعم أمريكي كبير في القاعدة .. و الحقيقة العساكر و الضباط الأمريكان طلعوا كرام فعلا .. والتيبس بتاعهم لأنه من شيم الكرام فبيتراوح من 50 دولار إلى 500 دولار!!!

طبعا لها حق البنت تيجي كافيه "لونوتر" و الدمعة فارة من عينها ووشها وارم من العياط ..
المهم سألتها : معذرة ليه بيعطوكي بقشيش كبير كدة؟
: ما أنا أصلي بأحب شغلي و بأعامل العملاء بحب و بأخدمهم و أنا بابتسم و باجيب الطلبات جري.
إذن الإبتسامة = صدقة زمااااااااااااااااااااااااان
!!! الابتسامة اليوم = 500 دولار تيبس
و بعدين البنت بتجري .. مش بتمشي ذي العسكري .

papi:

ده الواحد مخه طلع تخين بشكل.. طب ما كنت توضح.. أو حتى لمح .. لازم تسيبني على عمايا .. استنتج بعد سنين إن الابتسامة هي نوع من الإسترزاق الأنثوي!!

و الله الواحد خايف تفهم مني إني ذي الأبناء اللي ما بيفهموش قيمة أهلهم الا لما يكبروا.. صدقني كنت مقدراك .. بس الأن أكثر.. يمكن الصورة بتوضح اكثر في البعد.. يعني أتذكر مواقف وافكر فيها و أندهش جداً.

أستغرب انك كنت تساعدني في لعب الطاولة إذا غلبت وليد .. و تتبسط .. مع إنك لست من النوع اللي يفرق بين أولاده .. و لما إستفسرت منك عن سبب إنبساطك و مساعدتك لي .. قلت لي:أنت بنت و أصغر من وليد و طبيعي أقف مع الصغير و أساعده .. و أنا ملاحظ أن وليد أقوى منك و أكبر و بيلعب أحسن .. فلازم أقف جنبك .. و لو هو كان الأصغر .. كنت وقفت جنبه هو .. و اتبسطله هو.

أستغرب لما افتكر اذاي برضه كتمت نظرتك السعيدة لما غلبت أنكل عاطف -الله يرحمه- برضه في الطاولة.. وأنا متأكدة انك بتفرح لي في أي حاجة حتى لو بسيطة.. لكن قلت لي : حاولي ما تغلبيش راجل كبير و في سن والدك .. الموضوع ده ممكن يضايق الكبار منك أو يحز في نفسهم إن بختهم وحش حتى في لعب الطاولة مع العيال.
أستغربك جدا إنك كنت حازم لدرجة القسوة و طيب لدرجة الرحمة الشديدة .. و خصوصاً مع المرضى .. لدرجة كانت جعلتنا نفكر احيانأ في التمارض.. سبحان الله.. صار لي عشر سنين مش محتاجة اتمارض .. دخولي المستشفى اصبح سنوي و قد توطدت علاقتي مع الأطباء حتى أصبحت وثيقة للغاية هاهاهاهها.

تخيل أني الى الآن .. لا أعرف كيف كنت تفرق بين غضبك من محامي أفاق و مداومتك على زيارة إبنته المريضة بالمستشفى و تعاطفك مع والدها وخطيبها و أسرتها كلها.. و حرصك على إصطحابي معك لزيارة مريضة لم التق بها في حياتي إلا على فراش المرض.
تعرف حضرتك.. من المستحيل إختزال تربية سنين في سطور.. ده يبقى إجحاف حقيقي.
وأكيد حضرتك عارف إن إحنا اتعلمنا من اللي شفناك عملته أكثر بكثير مما تعلمناه مما سمعناك قلته.
* فلم يكن صعب على وليد عدم التدخين لاننا لم نرك تدخن .. ولا ليك في أي مكيفات أو مخدرات لكن شفناك مداوم على الرياضة و النظام و الشغل و التواصل و صلة الرحم و مساعدة الناس.. كل ده شفناه عملي مش نظري.
و اذا كان ينقصني شيء كبير فهو .. أني لم اشكرك كما يجب على كل شيء .. على وجودك في حياتنا بقوة .. على وضعك لنا في أعلى قمة اولوياتك .. على تحَريك الحلال في تربيتنا .. و على اختيار مامي و على اختيار أسماء حسنة لنا و على حرصك و ثقتك في أن مامي هي أفضل من ستعلمنا ديننا.

افتقد كل ذكرياتي معك .. اوقات مشاهدتنا للتلفزيون مع بعض و متابعتنا لتمثليات الساعة السابعة و الربع .. بدأً من مسلسلات المشربية .. ميزو .. علي بيه مظهر .. احلام الفتي الطائر .. حنفي الونش.. زينب و العرش..عائلة الدوغري .. الأيام .. أديب .. شرارة .. عائلة شلش .. دعوني أعيش ..صيام صيام .. دكتور محمد و أخواته البنات.. دموع في عيون وقحة ..بابا عبده .. الشهد و الدموع .. رأفت الهجان و الرجل الاخضر و بايوننج ومن و ستيف اوستن و اوشين و ماك جيفر و أفلام نادي السينما يوم السبت "الرولز رويس الصفراء و صوت الموسيقى و سيدتي الجملية"
حتى الإعلانات.. أفتقد تعليقاتك الساخرة عليها بدءاً من " أين تذهب هذا المساء" و"مام ماميا " .. "باك بتاعي و باك بتاعك .. باك بتاعنا كلنا.. "مرورا ب "امشي بسرعة يا واد يا حسين.. شوف لنا ريري بيتباع فيتن .. هات لنا نه باكو و اتنين .. البركة في ريري." و اكيد اعلان " مصر للتأميم .. حصن أمان للملاين " كان بمثابة بشرى بقرب موعد المسلسل في رمضان .. أما الاعلانات التحريضية ك.. إنسفي حمامك" لليسيكو و التحفيذية ك "الأربع اسباب" الدافعة لإستخدام معجون الحلاقة و .." كنت هاقولها " لمعجون كولجيت للاسنان .. فكانت تضحكنا .. وصولا لظهور اعلانات" شوف العقد شوف الشراشيب" و" محمود ايه ده يا محمود؟!" و حتى بدأ حسن عابدين في عمل إعلانات" شوية شوية شويبس اهي جاية" و التي كانت جواز مرور للكثيرين غيره بتقليده" و منها بدأت الجميلات المراهقات يدخلن عالم الاعلانات قبل ظهور الفيديو كليب!

أفتقد نزولك للصلاة في الجامع يوم الجمعة و بعدين نروح النادي نتفسح.. و سفرياتنا مع بعض و كل الحياة الحلوة اللي عشناها مع حضرتك.

Papi:

تعرف الموضوع زمان كان بسيط .. أول عن أخر محطيتين ..الأولى و التانية.. وكان قرار تغيير المحطة لا يتم بسهولة لأننا لازم نقوم بنفسنا و نغير المحطة و نعمل بتاع تالت أربع تاكات .. لكن النهاردة .. توحشت الفضائيات و الموضوع بقى هيصة .. يعني حضرتك كنت خايف علينا من القناة الأولى و التانية .. و عامل ريستريكشن على إيه اللي المفروض نشوفه و نقد لعروض غير ذات قيمة .. و الكلام الكبير أوي ده..
أكيد حضرتك عارف إن الموضوع فلت خلاص .. و الدش فيه بتاع ألف محطة و أكثر .. و النت فيها بتاع مليار موقع .. طب هاعمل إيه مع محمود و دانا؟!

محمود اليومين دول بدأ يشبط في محطة " تاتووون" يقصد" سبيس تون"بيحبها جدا .. هي مشكلتها أن كم العنف اللي فيها شديد جداً..الغريب بقه انه بيمووووووت في قناة دبي.. لسة دلوقتي عمال يقلي اقلب المحطة و اجيب دبي .. مع إن فيها اخبار.. لكن بصراحة أحسن الفرجة على الهلس اللي في باقي القنوات .. ولو ان الأخبار برضه فيها عنف.

تفتكر ليه بيحب قناة دبي؟ بيتهيألي بيحب موسيقى الشارة بتاعتها.
عموما اهي.. افضل ما نقلب محطات تانية فتيجي مغنية و لا رقاصة من عينه روبي او هيفا او نجلا و بوسي سمير.

الموضوع شكله باظ

Papi:

عارف حضرتك الموضوع شكله باظ .. باظ خالص، و فلت من ايديهم .. بص حضرتك انا بقيت اتكلم زي الناس.. اللي لما تيجي تشتكي من وضع معين .. تبني الفاعل للمجهول.. مع ان في اللغة.. الفعل هو من يبنى للمجهول ..عموما الفاعل اليومين دول لم يعد يستتر .. ده عيني عينك و على عينك يا شعب و جهارا نهاراً يا حكومة.. و عادي تلاقي وزير اعلام يقلك .. مش عاجبك اقلب المحطة! و وزير ثقافة يهاجم المحجبات و يساند الموديلات.

دي أخلاق القرية يا عالم!

يعني زمان كان الناس صحيح مش مقياسها الدين و لا الشرع .. و يقولولك إحنا ناس شرقيين و في عادات و تقاليد..
لا .. ننسى بقه الكلام اللي عفى عليه الزمن .. دلوقتي بيقولوا العالم أصبح قرية صغيرة .. طيب هي دي أخلاق القرية يا عالم!

المهم كان زمان تسمع الممثلة من دول تقلك : المخرج عايز كده .. المشهد الساخن مؤثر في حبكة السيناريو .. و سياق الفيلم يستدعي .. و أنا لا أمثل الاغراء الصريح و لكن الاغراء المحترم .. يعني مصطلح الإغراء المحترم موجود من أيام هند رستم و فاتن حمامة .. و دول كانوا بيتباهوا انهم بيقدروا يقدموا إغراء بالنظرة و بالخطوة.. و تصدق.. الممثلين بتوع زمان اللي كانوا بيقدموا الإغراء – المحترم- هما اللي بينتقدوا ممثلات الإغراء – الغير محترم- بتوع اليومين دول!

" فريندشيب كيس"

طب أقول لحضرتك ايه .. و الله حاجة تكسف .. اليومين دول الموضوع مش محتاج لا حبكة و لا مخرج عايز كدة و لا أي حاجة.. و عادي جداً .. تسمع مؤدية او ممثلة أو راقصة مغمورة تقل لك .. ضروري أقدم تنازلات لزوم الإنتشر! و من غير إنتشار.. دول بيسلموا على بعضهم في البرامج بالقبلات و الأحضان.. و بيسموها " فريندشيب كيس"!

دعارة موسيقية

طب تصدق حضرتك انهم بيطلعوا إشاعات على نفسهم علشان مزيد من الشهرة .. و سمعتها بودني.. ممثلة بدأ نجمها في الأفول.. المهم عملت كليب مع مغني ما.. يقوم الكليب يعدي في صمت.. عيب .. ما يصحش..
قامت الست طلعت على نفسها إشاعة ان هناك قصة حب تجمعها مع المغني اياه علشان الصحفيين بيموتوا في الأخبار الهايفة دي .. فطبعا هيسألوها .. فتقوم تطلع في الفضائيات و على أغلفة المجلات وأخبارها تملأ الصحف.. و بعدين تكذب الإشاعة المغرضة التي تريد النيل من شرفها و تهدد و تتوعد أنها ستقاضي كل من تسول له نفسه أن يشيع عنها أخبار كاذبة و عجبي!!
و لما يسألوها تقل لهم .. ما تصدقوش الأقلام المغرضة الغير شريفة..
لا حول و لا قوة إلا بالله .. مع إن هي الي مطلعة الإشاعة على نفسها!

* سيبك من الإشاعات .. خلينا في الواقع.. يوم الإثنين الماضي .. استضافت مذيعة برنامج " نأسف للازعاج .. اسمها ايه .. غريبة ناسية مع انها مشهورة .. بس أصلهم كتروا .. المهم استضافت حلمي بكرى الملحن .. الراجل قال كلام .. مهما اقول لحضرتك اد ايه كان صريح و مستميت في الهجوم على أدعياء الفن.. و قالها بصراحة :"دي بقت دعارة موسيقية"!

مغنيات أم غواني؟!

تخيل أنا من سنيتن تقريبا كتبت مقال في جريدة" الشرق" القطرية أسمه " مغنيات أم غواني" المهم اعترضوا على العنوان .. جيه حلمي بكر و قالها بالمفتشي .. دعارة موسيقية.. و علشان يؤكد كلامه قال ما معناه: لما تشوف في كليب واحدة طالعة في البانيو و المخرج حاطط رقم تليفونها في خلفية المشهد .. ده يبقى اسمه ايه؟ أكيد نوع أخر من القيادة غير قيادة الأوركسترا!
سبحان الله راح زمان اللي كان المخرج فيه يتحايل على المشاهد الخارجة ، فيقوم عامل صوت رعد و برق .. دلوقتي بيعمولوا المشاهد و يفصلولها سيناريو أو أغنية .


و بعدين في مصر بدأ يظهر الرعب من سحب البساط من الفن المصري و الإعلام المصري بشكل عام.. و المذيعات اللبنانبات عاملين صداع كلي مزمن للباقيات الصالحات.. مما جعل الصالحات دول يخلعن ملابس التقوى و الصلاح و قالك لازم ننافس.. نكن أو لا نكن..

أعذرني اني طويلت على حضترك .. ما أنا أصلي باحس و أنا باكتبلك إني معاك .. و نفسي تكون اتبسط إننا سمينا محمود على إسم حضرتك .. هو كل شوية يشوف صورتك و يقوللي: بابا ديدو مامود
حتى دانة .. ياااااااااااااه .. كان نفسي تشوف أولادي و تربيهم معايا و تلاعبهم و يفخروا بك و يعتزوا بوجودك.. لكن أنا هاربيهم على حبك .. و ثق انك مغروس في دمهم و محفور في ملامحهم و عارفينك جداً و هيعرفوك اكتر كل لما يكبروا.

: Papi

هتفضل عايش فيا و في وليد و في أحفادك عمر و محمود و عليا و دانا و هيفضلوا يعيشوا بقيمك .. أنا هافضل أدعي لك طول ما أنا عايشة .. و إن شاء الله دعائي يصل لك.. و هافضل أهاديك في عيد ميلادك .. و إن شاء الله ربنا يوصل عني هداياي.

ربنا يجمعنا على خير و يقرب البعيد و يرحمك برحمته الواسعة .. بأدعيلك ذي ما كنت بتدعيلي.. و باشكرك على كل حاجة عملتهالنا.. و باشكرك علشان عرفتنا قيمة الأب و الأم .. و بالوم نفسي جامد .. على كل نبرة صوت عِليت على حضرتك .. و على كل باب اتقفل بشدة و أنا ماشية زعلانة .. و على كل "لأ" اتقالت لحضرتك حتى لو مكنتش سمعتها لك او قلتها في سري ..
و باندم على كل برطمة برطمتها ..
باندم على كل رأي خالفتك فيه و على كل أمر عصيتك فيه لمجرد العصيان و طلعت حضرتك دايما صح..
باندم على كل لحظة ما قضتهاش معاك.. باندم على الجواب اللي عجبك رغم طوله .. فتمنيت انه كان يبقى أطول .. وعلى الهدية اللي عجبتك .. كان نفسي تكون أغلى .. وعلى كل حاجة و أي حاجة ضايقتك فيها .. بأندم على أن الندم مش في وقته .. أه لو كان في وقته.. اه لو كل واحد يلحق ما يندمش. يلحق قبل الفقدان...

فقدتك يا أعز الناس
فقدت الحب و الطيبة
و أنا من لي في ها الدنيا سواك .. و إن طالت الغيبة؟
رحلت و من بقى وياي
يحس بضحكتي وبكاي
و حتى الجرح في بعدك
يغزيني .. و هل لي به؟!
تصدق ؟ قد ما حنيت ..
أشوفك في زوايا البيت
و أسولف معك عن حزني
و أحس إن أنت تدري به
أنا من لي في ها الدنيا .. سواك و إن طالت الغيبة
ش أسوى بالألم و الأه ؟!
لكن البقا لله .. يصبرني على بعادك
و ذا قدري و راضي به
فقدتك يا أعز الناس

( حسين الجسمي)
(فيصل اليامي)

اللهم إرحم والدي برحمتك الواسعة يا أرحم الراحمين .. اللهم اجعل قبره روضة من رياض الجنة ,اللهم ادخله الفردوس الأعلى دون سابقة عذاب او حساب.. اللهم أرضني فيه و بلغني رضاه و بلغه مني و عني السلام و المحبة .. يا أكرم الأكرمين يا رب الأحياء و الأموات يا رب العالمين.. اللهم و أباء و أمهات المسلمين أجمعين.. آمين.

ابنتك
داليا محمود الحديدي
الدوحة- قطر
24 محرم 1428ه
13- فبراير – 2007

=========================================

الرسالة الثانية - ماذا أصابك يا وطن ؟

ماجدولينا حبيبتي:

فرحت برسالتك فوق ما تتصوري .. بذمتك لسة حد بيناديكي ماجدولينا غيري؟ فينك من زمان؟ أخر لقاء بيننا كان في عزاء بابي – الله يرحمه- منذ أربع سنوات.. الدنيا بتفرق جامد يا ماجدة لكن:
قد يجمع الله الشتيتين بعد أن ظنا كل الظن أن لا تلاقيا


أصدقاء على الورق
و ربنا يجمعنا على خير عن قريب إن شاء الله.. بس بجد اتبسط إن الرسالة الأولى عجبتك وأننا سنرجع نتواصل مرة اخرى.. حتى لو تحولنا لأصدقاء على الورق.. لكن أحسن من مفيش.. أنا مش عارفة ازاي بتسأليني إذا كنت فاكرة أيام الجامعة ولا.. لأ؟! .. ده أنا عايشة على الذكريات دي.

بتقولي رسالتي الأولى كانت مؤثرة.. طب المرة دي هاحاول أضحكك.. و لو أني ماليش في الكوميدي.. بس هاقلك نكتة ياسر قالها لي في مطار القاهرة يوم عودتنا إلى قطر .. طبعا أنا كنت متضايقة لأني تاركة مامي و العائة كلها .. و كلنا في المطار بنبكي و الجو درامي جداً.. فبيتهيألي هو حب يكسر موود النكد فقال لي النكتة دي.. النكتة ما بتقلش حاجة.. فقط المضيفة الأرضية بتنادي على المسافرين اللي هيتركوا مصر متجهين للخارج بتقول:"على السادة أولاد المحظوظة اللي طالعين من "هنا " أن يتجهوا الي البوابة الفلانية " نكتة لما سمعتها ضحكت حتى الوجع.. انتي عارفة المصريين اكتر ناس يضحكوا على أوجاعهم. بس أنا ضحكني مصطلح " السادة أولاد المحظوظة "و قعدت أفكر .. ليه الناس في مصر حاسيين السنين دول أن اللي طالع من مصر مولود و الداخل فيها مفقود .. رغم انه مش طالع بمزاجه.. و لا مسافر يروش.. ده متغرب و تارك اهله و حاله و محتاله و مشهر افلاسه .. و معروف طبعا أن المغترب بيكون مش من هواة الغربة و الشحططة .. لكن لأن في بطالة و أزمة اقتصادية طاحنة و متأزمة في البلد.. فمضطر يركب الصعب.. ده مش بس مضطر .. ده حتى أهلنا اللي بيحبونا ولا يحتملوا فراقنا بيحذرونا من العودة.. خوفاً علينا من تدني الأوضاع في البلد.. تخيللي!
و رغم ذلك، فكثير من المصريين بيحسدوا المغترب على غربته رغم انه هيعيش متشحطط .. ليحصل على لقب "مواطن درجة ثنية "على أحسن تقدير.
عارفة.. في مثل بيقول" بيحسدوا الميت على موتت يوم الجمعة"!
و اذا كان الموضوع مش حسد .. يبقى لازم نبحث للناس اللي لسة ما "هجتش " من مصر على سبب او عذر.. يخليهم يطلقوا على المغتربين مصطلح " السادة أولاد المحظوظة".
تفتكري المصري القيم في مصر يعتبر مواطن من الدرجة الكام؟ درجة ثالثة.. مش كده ؟ سييبك المهم نتكلم عن الاسباب ..
مش السبب يكون البطالة مثلا؟ أو يمكن كوكتيل الغلاء و الفقر مع الأمراض و الأوبئة وانتشار الجرائم و النصب و الزني باشكاله" زنى أبو ورقة و الزنى الشفوي و زنى المحارم و الشذوذ و خطف الأطفال و قتلهم و المتاجرة باعضائهم و أكياس الدم الملوثةو المياه الملوصة أيضاً و المخدرات و الخمور- مشروبات روحية هق هق هق هق - و سفاح المعادي والتوربيني والقطار اللي ولع و اتحرق باللي فيه و قطار آخر "اتشقلب " برضه بمن عليه والسفن اللي بتغرق و ما فيش تعويض لاهالي الغرقى.. و صاحب السفينة المُهَرب.. و التهليب اللي في البلد.. و التعليم .." شالوا سنة سادتة .. جابوا سنة ساتة .. عالم فاضية ورايقة"، بالاضافة للمشاكل الاجتماعية و الاقتصادية و السياسية بالمرة .. وبالتالي عدم الشعور بالامان .. او بفهم الواقع وبالتالي رفض الناس لواقعها و حياتها في مصر.

عارفة يا ماجدة :
كل دول العالم فيها مشاكل وأزمات و مصائب و نهب وتهليب و بلاوي تيركواز .. بس فيها كمان انجازات على مستوى أعلى .. فالموضوع فيه توازن.
عارفة النكتة اللي بتقلك : وزير مصري راح يزور وزير أمريكاني في بيته على العشاء.. فالوزير المصري انبهر بفخامة بيت نظيره الأمريكي و سأله .. من أين لك هذا؟ فأخذه عند الشباك..
قاله: شايف الكوبري اللي أمامك..
فالوزير المصري قاله: نعم.. و لكن لم يتم الانتهاء منه بعد
الوزير الأمريكي: انا عندي ميزانية.. بأبني بثلاث اربعها الكوبري و الربع الأخر وضبت البيت و عملتله الديكوريشن!
بعد سنة جاء الوزير الأمريكي لمصر .. فاستضافه نظيره المصري ليقوم بعمل الواجب معه.. و كان انبهار الوزيرالأمريكي ببيت الوزير المصري أشد مئة مرة و سأله نفس السؤال" من أين لك هذا؟"
الوزير المصري خده عند الشباك و قال له : شايف الكوبري اللي هناك ..
الوزير الأمريكي: لا مش شايف
الوزير المصري: ما هو كان مفروض يكون فيه كوبري .. بس انا قلت أوضب البيت و أعمله الديكوريشن بالميزانية، وإذا فضل من الميزانية حاجة أعمل الكوبري.. بس للاسف البيت و الجنينة أخدوا االسقط و اللقط .. يا ساتر على الصنايعية و التهليب بتاعهم!!

على طبق بلاستيك!
ماجدة:
كل الدول فيها فساد و قرف.. و كل البيوت فيها دورات مياه.. و كلنا عارفين طبيعة و ماهية الأشياء الموجودة في دورات المياه.. يعني الموضوع مش محتاج "فكاكا".. لكن رغم ذلك ما حدش ينكر ان في دورات مياه نظيفة .. و اخرى رائحتها كريهة و مميتة و قاتلة.. و بصراحة دورات المياه في مصر ريحتها فحفحت!

تعرفي المؤسف هو عجزنا عن حصر المشاكل في حاجات محددة مشكلة ..اتنين ..تلاتة.. ألف.. لأننا عارفين أن الموضوع " بهوأ " و حتى لو تم الحصر .. شوفي مين بقه الي حيحل..
* تيجي واحدة تغتصب في عز الظهر .. يقلك :عادي.. بتحصل في أحسن المجتمعات.
* قطار يتحرق.. يا جماعة وارد .. هو انا مغسل و ضامن جنة.
* طيارة تقع و طيارين يروحوا في داهية.. و لا الهوا..
* سفن تغرق.. و ناس فقراء.. كاناو جايين يزوروا اهلهم او راجعين من عمرة .. ما يلقوش قبر يلمهم .. و الحيتان بعملوا عليهم وليمة معتبرة من أجساد النساء والأطفال و بقايا المسنين. ومع ذلك.. هيصة شوية ثم يتم تهريب الجاني.
* جثث مصريين تيجي من العراق .. الله يرحمهم.. بس شهداء.. يا بختهم.
* ممثلة " تتشألط " في إنجلترا.. الأعمار بيد الله.. و يطلعواعليها انها انتحرت.. ما هي طالما سنها تعدى الخمسين و وزنها تعدي الثمانين و رصيدها في البنك قل عن الملايين .. فالعجلة لازم تدور و مصر ولادة.. لكن هنعملها جنازة مهيبة .. و نتاجر بسيرتها .
* نجمة أو نجم لسة محافظين على الأرقام الخاصة بوزنهم و سنهم و رصيدهم في البنك.. و عملوا " بلوة مسيحة " هما و أو أولادهم.. لا حرام بقه.. لازم نحافظ عليهم .. دول ثروة مصر الفنية القومية.. علماً بان احنا في مصر بنطلق مصطلح نجم على الممثلين و اللعيبة فقط.. سيبك بقه من الأحاديث اللي من 14 قرن" أصحابي كالنجوم بأيكم إقتديتم .. إهتديتم" .. ياه لسة فاكرة الكلام بتاع القرون الماضية دي .. ما نعيش الواقع بقه.
* انتشار لفيروس انفلونزا الطيور.. ما قلنا.. تم السيطرة على الوضع و مش عايزين بلبلة للشعب!
* انتشار حالات الإيدز.. الله.. ايه الدوشة دي؟ مش إصة بقه.. ما تم توعية الشباب المسافر إلى" شارم"و وفرنا لهم كل وسائل الوقاية.. بس هما ياخدوا احتياطاتهم .. و يعيشوا حياتهم .. الله ينور.
* عمرك شفتي نظام بيضع رجال شرطة و أمن و حراسة من أجل حماية الكباريهات و الملاهي الليلية و علب الليل.. و عمال يقفش في الشباب الي بيصلي الفجر حاضر في الجامع؟ شفتي دولة بتشجع على الفضيلة أكتر من كده! ! يعني عايز تزني .. تشذ .. تهبب اي مصيبة .. اوكيه .. بس الله يرضى عنك .. بلاش تزمت .. و بعدين ما هو دور الشرطة هو حماية الشعب من "الدقون" و أدعياء الفضيلة.. ده الرئيس بوش بذات نفسه محذرنا منهم .. لا و كله إلا الإرهاب.
* عمرك سمعتي عن بطئ في التقاضي مثل الموجود في مصر.. في ناس ماتوا و لم يحصلوا على ميراث لهم من أجدادهم.. مش من أبائهم.. و بيتكلموا عن نزاهة القضاء .. بس برضه – يحيا العدل!
* عمرك سمعتي عن " ترزية قوانين " زي الموجودين في مجلس الشعب.. و كله" بال أنون".. ما لازم ندي فرصة للدماء الجديدة لاستلام القيادة.. علشان العجلة تسير؟!
* عمرك سمعتي عن التشدق بالحريات زي اللي موجود في مصر.. أغلب من قاموا بترشيح أنفسهم لرئاسة الجمهورية اختفوا في أحداث غامضة.
( إثنين منهم مرمين في السجن - برضه بال أنون- و العجوز اللي فيهم إستعملوا معاه الرأفة فوضع في المستشفى .. و منها على غرفة نومه لا يغادرها الا للذهاب للحمام)!
* عمرك سمعتي عن عسكري يتم قتله على الحدود بدون دية .. و كتم هس اسكت خالص إلا في مصر.
* عمرك سمعتي عن نظام ضرائب زي النظام المصري.. و بعدين ضرائب متنوعة .. الهاجج من البلد و مطرود منها.. يفرضوا عليه ضرائب "غربة" اسمها ضريبة العمل بالخارج .. حتى الأموات عملهم ضرائب أيلولة علشان يعكننو على ورثتهم.. عشان يبقى موت و خراب ديار..غير ضريبة المبيعات و غيره.
* لاحظتي يا ماجدة ان ما فيش حد متجوز .. بيخلف بالساهل؟ إلا لازم داكاترة و تحاليل و عمليات و مناظير أو أطفال انابيب .. لأن مصر اللي كان بها أعلى نسبة خصوبة في العالم من 70 سنة .. اليوم يعاني 17% من ابنائها من قلة نسبة الخصوبة .. و هي أعلى نسبة في العالم و المعلومة مأخوذة من برنامج 90 دقيقة على قناة المحور.. يعني الدولة تعمل ايه؟.. شعب مش راضي يسمع الكلام و يحدد النسل .. يعني نسيبهم يمشوا على مزاجهم.. لا.. الضرورات تبيح المحظورات .. مش ده دين برضه.
* عمرك سمعتي عن دولة عندها عجز في الميزانية مش عارفة كام.. ونسبة البطالة فيها 12 % ، و نسبة من يعيش فيها تحت حد الفقر تصل إلى نحو 50 % ..و مديونة للركب و حالتها كرب.. و نازلة حفلات و مهرجانات بيتصرف عليها ملايين .. و بعدين زعلانة جداً.. انها لم يتح لها فرصة استضافة المونديال! يا شيخة اسكتي دي حكومة هجص.
* سمعتي عن الطفل الذي أجريت له عملية مصران أعور.. بعد ست أشهر.. أهله اكتشفوا أن إبنهم من غير كلية.
* قرأتي عن الرجل الذي حاول الإعتماد على نفسه في موضوع الزواج فباع كليته .. أخذه منه حتة من الكبد كمان فوق البيعة!
* "أميتاب بتشان و جاكي شان و روبي و هيفا و غيرهم…" يتم إستقبالهم في مطار القاهرة إستقبال الفاتحين. . ما احنا شعب بيفهم في الأصول و الإتيكيت.
* الشيخ العلامة يوسف القرضاوي ترك مصر هربان بدينه و أهله بعدما سجنوه و حبسوه في جبل الطور في سيناء.. و جاء لقطر فتم تقديره .. ومنحوه في قطر أعلى المناصب و الجوائز و منح الجنسية القطرية و بناته أساتذة في جامعات قطر وإبنه دبلوماسي في الخارجية القطرية.. و حين يأتي لزيارة أهله في مصر .. يركنوه في المطار و يلطعوه و يعامل معاملة تجعله يشتكي .. و هو الرجل المكرم في كل أرجاء الدنيا.
* أول أيامي في قطر.. سالت عن أشهر الدعاة القطريين.. قالت لي شيخة قطرية" الشيخ يوسف القرضاوي" فقلت لها: الرجل مصري.. فضحكت بإستنكار و قالت" كان مصري.. اليوم قطر منحته الجنسية بعدما أهدته لنا مصر على طبق بلاستيك!

مامي مصر و أنكل سام.. ربنا ما يجيب زعل

* بزمتك عمرك سمعتي في الإعلام عن الدكتور أحمد زويل قبل منحه جائزة نوبل؟ ما انتي عارفة .. الراجل بهدلوه في الجامعة .. و اول فرصة جاتله خارج مصر.. خد ديله في أسنانه .. و لم ييعد حتى الأن إلا زائراً.. و اليومين دول الإعلام عامله الفرخة بكشك.. و طبعاً علشان أمريكا ما تشمتش فينا - و كله إلا الشماتة من واحدة "كيادة" زي اللي ما تتسمى- فيكفينا الإفتخار بشرف النسب لعالم مثل د. زويل .. و بما انه مصري و أستاذ يدرس في جامعات أمريكا .. فإحنا نبقى خيرنا على أمريكا كمان .. و هما اللي عالم" ناور" بيسرقوا أولادنا.. مع ان احنا اللي مصدرينه مجانا و بدون ضرائب.

* عمرك سمعتي في الإعلام عن الدكتور جمال حمدان إلا بعد وفاته؟ صدقيني الراجل كان مجهول من المجاهيل و أنا عن نفسي و لا سمعت عنه و لا قرأت له " عبقرية المكان" إلا بعد وفاته .. لما الإعلام فاق و تذكر أن عندنا عبقري رحل .. و الراجل يظهر لم يكن من النوع اللي يقدر يغترب عن مصر .. فعزل نفسه "عن مصر هذا العصر" حتى وافته المنية.
خبراء هلس
* مش تتفقي معي أن لو الدولة عملت امتحان للشعب المصري عن مادة " حياة الفنانين" حتجدي الشعب كله حاصل على درجة" أستاذ كرسي" في سيرة الممثلين والراقصين .. و اكثر المواقف الطريفة اللي قابلوها في حياتهم و متى بكوا و متى ضحكوا و ايه المقالب اللي عملوها في بعض .. و من تزوج من و من طلق من.. و من كان في يده العصمة.. و الجواز كان رسمي و لا من أبو ورقة.. و ازاي كانت اخبارهم وراء الكواليس .. يعني أصبحنا خبراء هلس.

عارفة يا ماجدة..
علاء الأسواني قال كلمة قاسية جداًعلى لسان البنت المصرية المعدمة اللي بتسكن على سطح "عمارة يعقوبيان" فتضطر للسماح لمديرها بالتحرش بها نظير عشرة جنيه فقط !
البنت قالت:" مصر بقت قاسية اوي على أولادها "
و طبعا مش المقصود مصر التاريخ و الجغرافيا و الأرض..لا.. المقصود مصر "المتأرأضين" عليها.. المبهدلين أرضها و بايعين ترابها ..الناهبين ثرواتها و مشحططين أولادها و مكسرين شوارعها.. أه من شوارع مصر يا ماجدة .. اه.
عارفة ان هارسلك صور لشوارع الدوحة عشان تتحسري على بلدنا.. عارفة انك عشتي في قطر فترة.. بس انا متأكدة انك لن تتعرفي عليها لو رايتها اليومين دول..
بس قبل ما أكلمك على شوارع مصر و قطر .. عايزة اسالك سؤال تبادر لذهني .. بصراحة كنت عايزة اسأله لمامي .. بس أحرجت.
تفتكري يا ماجدة لو نشب خلاف بين مصر و أمريكا ..فمع من يناصر دكتور زويل.. مع مامي مصر و لا مع أنكل سام؟
و لو نشأ نزاع بين مصر و قطر .. فمع من يقف الشيخ القرضاوي.. مع ماما مصر المحروسة و لا مع خالتي قطر؟
مع الأرض اللي أنجبت و الا مع الأرض اللي أعانت و قدًرت و ساندت وساهمت و منحت و كبرت.
ماجدة:
ارجو ألا يكون ردك:" هيقف مع الحق" لأتي عارفة انه طول عمره واقف مع الحق
لكن انا اقصد حاجة تانية خالص و كلامي واضح
عموما ربنا ما يجيب زعل بين الأخوة و لا يجيب نزاع و خلاف مع انكل سام.. الطيب أحسن.
لكن مش بيقولوا ان الأم هي اللي بتربي .. مش بس اللي بتخلف.
كيف يمكن لانسان ان يساوي بين تقديره لغريب احتواه و حماه ووفر له الحياة الكريمة له و لعائلته وأتاح له حياة آمنة.. الأمن على ماله و عرضه ووفرله تأمين صحي .. و لا يفرض عليه اتاوه او جباية او ضرائب رغم كونه غريب .. و بين قريب – المفروض أم- بترمي بأبنائها .. تسرق أعضائهم و تستبيح التحرش ببناتها أو تشغل بناتها راقصات و تأخذ منهن ضرائب لتبني بها مستشفيات و تعلى الأسافل و تدني المحترمين؟

أم تهين اولادها المقيمين معها في البيت و تساند من يظلموهم و تطرمخ على من يقتلوهم .. و تكبر دماغها إذا جالها جثة أولادها في صناديق و لما يهجوا برة البيت تاخد منهم إتاوة غربة.. و لما ينجحوا برة.. تفتخر بهم و تنسبهم لها و تقول: أنا اللي زرعت.. انا اللي خلفت انا اللي ربيت انا اللي كبرت.. و الفاشل منهم تتبرأ منه و تعامله معاملة الكلاب.
كيف أساوي بين غريب يدعمني و يستفيد من علمي و جهودي و يقدرني و بين أم تسرف في أموال أبنائها و تدعي انها بتشجع الإستثمار و السياحة ، فتهدر أموالهم في إقامة حفلات و مهرجانات و صرف مرتبات لمستشارين تصل إلى – 3 مليار جنيه سنوياً – و بعدين يقلك نقص موارد.
بصي يا ماجدة سيبك .. أنا بدأت اتنرفز.. خليني احكيلك شوية عن كورنيش قطر عشان نغير " الموود "
تخيلي.. الكورنيش عبارة عن قطعة عمل فنية من النوع السهل الممتنع.. تقدري تقولي عليه كورنيش
SOUPLE
فيه انسيابية و نظافة و نظام و ممهد للمشاه .. سواء لمشاه العبور او لمشاه التريض او لمحبي التنزه.. فالكورنيش طوله نحو 7كيلو متر.. ومرقم.. وكل 500 متر- تقريباً – توجد علامة رقمية- محفورة على الأسفلت - لمساعدة المتريضين وهواة المشي في عملية حساب عدد الكيلومترات اللي مشوها.. كمان في صنابير مياه .. تقيلة كلمة صنابير دي - مشيها حنفيات - للشرب لكل 2 كيلو تقريبا.. و بين كل 10 متر.. تجدي سلة قمامة خضراء كبيرة وواسعة و نظيفة.. يعني لن تشعري بالقرف اذا اقتربتي منها. و السلة ثابتة في الأرض يعني مش عرضة لللعيال يكسروها و يجيبوا داغها.. و إذا ارهقتي من المشي و حبيتي تستريحي .. فستجدي أريكة نظيفة جداَ و بجانبها عامود نور لا يضاء سوى ليلاً.. و الأرائك سليمة و مش مكسرة و موجودة في أماكن متفرقة من الكورنيش .
* في مصر الكناسين وعمال النظافة بيطلق عليهم " الزبالين"أما في الخليج فبيطلق عليهم " رجال نظافة " بيرتدوا ملابس صفراء نظيفة و قفازات..وهم غالباً من بنجلاجديش أو نيبال و شكلهم يدل على انهم رجال نظافة و بعدين ما تلاقيش حد منهم بيبتسم لك و يقل لك كل سنة وأنت طيبة.

* كورنيش الدوحة و المنامة و البحرين و الكويت و مسقط عبارة عن حدائق بها زهور ولينات" جمع لينة وهي النخل الصغير.. و غالباً ما يتم إستيراد هذه الشتل والزهور من الخارج.. و لا يوجد متسولين في الشوارع سوى في السعودية.. و أو هكذا لاحظت.
* البلدية في قطر و في مختلف دول الجزيرة العربية مخصصة مواقف سيارات بطول الكورنيش.. سواء للسيارات العادية أو لسيارات المعاقيين علماً بأنه ممنوع دخول سيارات النقل لهذه المواقف.

مرتزقة مواقف الباركينج

*جميع هذه المواقف مجاناً .. و استحالة تجدي سايس غلس يقلك: اتفضلي يا هانم .. خشي يا مدام .. اقدام.. إكسري شمال تعالي ..تعالي حااااااااااسب..
* و ما فيش بقه كل سنة و انت طيبة.. ولا مواضيع الشاي والقهوة والحاجات اللي تعكنن عليك يومك و أنت بتبتديه الصبح وعايزة تركني عربيتك عشان تروحي شغلك.. ومافيش سياس و لا مرتزقة مواقف باركينج.
و كمان ما فيش العواميد الي بتحطي فيها فلوس او كروت علشان تركني زي الموجودة في مصر.. و بالتالي فلن تشعري ان في حد انتهازي بيضحك عليك ونفسه" يأرطسك" و يقول لك ان المكنة سحبت مبلغ من الكارت الخاص بالركن و بعد كده تلاقي الكارت" شحط" و ما فهوش فلوس للركن. .و اهم حاجة في عدم وجود سياس ركن في مواقف قطر .. ان الموضوع ده يجعلك مطمئنة على كرامتك!

ما انتي عارفة يا ماجدة - الإنسان كرامة قبل أي شيئ - يعني لو ما معكيش فلوس او فكة.. ما تخافيش إن واحد هلفوت يبصلك او يزغرلك او يشتمك بالأم والأب و الجدود علشان ما دفعتلوش" الشاااااااي يا ست.. هانم".
و الشاي - لمن لا يعرف -و لو اني اشك ان في حد مش سامع عن الشاي في مصر- هو" إتاوة ركن " رغم أن السايس لن يقوم بعمل أي خدمة لك. و كمان تتطئمني ان ما في أحد " هيليطلك "العربية.. و رفعلك المساحات.. لياخذ منك بقشيش.. أصلا بيمسح العربية و هو بيبصلك انت مش بيبص للعربية .. هو بيتفحصك بنظرة معناها: أنا عايز أعرف .. انتي فييسة هتدفعي بالذوق .. و لا ها .. أطول لساني ..
التجارة بالاخلاق.. ناقصين خيبة

سبحان الله الناس في مصر ابتكروا حاجة خايبة هي " التجارة بالأخلاق و السلوك.. يعني الناس أصبحوا يتاجرون باخلاقهم..
* يعني تدفعي جنيه تحصلي على كلمة: شكرا يا ست.
* تدفعي خمسة جنيه : تحصلي على "سلعة إحترام" عبارة عن كلمة "شكرا يا ست الكل"
* ولو دفعتي اكتر.. يمشي وراكي بالدعوات لغاية ما تمشي و كمان ..شوية حركات تقدير و إنحناء ووسع للست منك له لها لهم .. وسع للهانم يا اسمك ايه .. اتفضلي يا مودام .. سكتك سالك و طريقك فل!!
* اما لو قدر لك ساعتها انك ما تدفعيش لأي ظرف.. فستكون النتيجة فورية.. نظرة و تكشيرة صاخبة معناها "عارفكم يا عالم يا لمامة يا حوش.. ده انا كنت ناوي احترمكم و ابتسملكم .. خسارة في جتتكم .. ده انا وسعتليكم .. و برضه ما فيش فايدة .. خير تعمل شر تلقى .. الدون هيفضل طول عمره دون.. بس و ديني لاوريكم لو هوبتم في المنطقة دي تاني" غريبة ان نظرة واحدة تحمل كل هذا السباب و هذه الإهانات!
* و اذاأعطيتيه ربع جنيه يرميها في وجهك و ممكن يبصق عليك أو يضرب العربية "شلوت " و انتي ماشية .
فعلا الناس في مصر ابتكروا موضوع التجارة بالاخلاق و السلوك.. حتى الابتسامة دخلت سوق البورصة.
* في ناس بيضطروا "يشتروا نفسهم" ازاي.. عارفة إزاي؟ بالتكشيرة.. اه وحياتك زي ما باقلك كده .. كان زمان يقلك ابتسم تعش تنتعش " اليومين دول بيقلك " كشر ونظًر و إياك تهزر" .. و كله سوء خلق.

* تبقى واحدة عارفة انها هتضطر تروح شغلها كل يوم .. فاستحاتلة تدفع يوميا جنيه أو 2 جنيه.. هو المرتب فيه كام جنيه أصلا..فتعمل ايه .. تضرب بووز متين.. وتديها نظرات قاسية معناها .. يا بن الذين .. انا واحدة " لبط" ومش هتنول مني مليم أسود و حسك عينك تعمل أي حركة .. انا مقطعة البطاقة وهاروح فيك في ستين داهية!
* الرجالة أنصح فبيستخدموا اسلوب " الهت "و التكشير و ضرب البوز.. بس امعانا في اتقان الدور.. يخشوا في السايس شمال جامد.. و يكلموه بنبرة حادة و عنيفة.. و ممكن يسبقوا و ينادوله بشتيمة تدخل في باب الكبائر .. لإجبار السايس " للم" الدور.
* و الأنصح من دول واحد يعمل انه بيكلم سيادة اللواء مش عارف مين.. ليعطوا انطباع ان له معارف من الشرطة .. فيحجم السايس و "ما يبمبكش معاه".. فالرجل يقول في نفسه" سيبني من العالم الواصلة دول" و يقرر ينتقم من فئات أخرى!
* على فكرة.. . تبادل النظرات القاسية و النبرات الحادة والسباب والبذاءات تتم في الشارع المصري بدم بارد و ضمير مركون وقلب.. اصحابه شايف انه طيب و حساس و حنون.. و بالنسبة للحديث النبوي اللي ما معناه" ان شر الناس عند الله منزلة يوم القيامة .. من تركه الناس إتقاء شره .. و في رواية اتقاء فحشه " بسيطة جداً .. يطعنه في صحته.. و ممكن تلاقي واحد يتفلحس و يقلك: أصل الرسول- عليه الصلاة و السلام– لو كان موجود أيامنا كان غير رأيه" !!!
بالمناسبة .. الحديث صحيح و روته السيدة عائشة و مذكور في البخاري.

المنقبات عايشيين عصرهم الذهبي في الخليج
عارفة يا ماجدة:
الرسالة دي هتجدي فيها كلمة " الغريب" كتير جداً- ما علينا-
كنت باقول ايه.. أه .. كورنيش الدوحة بيبدأ من منطقة اسمها" رأس أبو عبود "بجانب بيتي و حتى فندق الشيراتون – مساحة تمتد من 7 إلى عشرة كيلو تقريبا.. و كنت شبه يومياً امشي على الكورنيش و أقابل ناس قطريين و شوام على أجانب.. ناس بتجري بالتريننج.. و ناس تمشي بالدشاديش و سيدات بيتمشوا بالعباءة .. و منقبات يمارسن رياضة المشي بالنقاب.
الغريبة ان كان عندنا فكرة في مصر ان المنقبة دي.. يالله حسن الختام .. يعني ست قررت تتنقب .. هي حرة .. بس ما لهاش دعوة بالمجتمع.. خلاص بقه كفاية عليها كده "تتكن" في بيتها و تتلم اليومين الي باقينلها في حياتها.. و ما فيش داعي نشوف خيم سودة في الشارع..لكن هنا المنقبات عايشيين عصرهم الذهبي.. يروحوا و يجوا و يشتغلوا و لهم أنشطة اجتماعية .. و البلد توفر لهن أماكن مخصوص في المطاعم و البنوك و النوادي والكافيهات وفي كل مكان.. و بيمارسن حياتهن بشكل طبيعي جداً و مش مضطرين يكونوا دائما في حالة دفاع عن النفس ليثبتن انهن لسن ارهابيات و ان فكرهن غير متطرف.
المهم انهن يتريضن عادي خالص و يتنزهن مع اولادهن سواء على الكورنيش او في المولات او في أي مكان.
يلبسن الجزم الكاوتش على العباءة.. والنقاب على راسهن و مغطي الوجه و"اليه هوب .. واحد اتنين.. "ويمشوا..– عادي جداً - .
كمان في حاجة في قطر اسمها "بَطُولة"- بتشديد حرف الطاء- .. بيلبسوها الستات المسنين - لو كنتي تابعتي الكارتون بتاع" أم خماس" اللي كان بيجي على قناة دبي في رمضان.. هتعرفيه - هي عبارة عن عن حاجة لونها ذهبي توضع على الأنف .. و اقصد اقول انك لو شفتي الستات دول .. ممكن تفتكري انهم مش معقول يفكروا يمشوا او يتريضوا .. هما ناس شكلهم " اولد فاشون جدا" و غريبة انهم مهتمين بالرياضة.. بس يظهر الوعي الصحي منتشر هنا.
كمان بيستخدم كورنيش الدوحة في التنزه العائلي ..و حدائق الكورنيش تستغل لعمل رحلات" الباربيكيو" و طبيعي جداً أنك تجدي اسرة في يوم جمعة- مثلا-.جايبين الشواية في الجنينة و فارشين المفارش الكارو الجميلة و بيشووا لحمة و الاولاد بيلعبوا جنبهم او بيتدحرجوا على المروج.
و في ناس بتمشي مع اولادها .. يعني انا كنت أمشي و أنا حامل و باجر محمود بعربته.. و في اجانب بيجروا و معهم زجاجات المياه و الوكمان وعايشين حياتهم.

ملحوظة: رياضة المشي تمارس في فصول الشتاء و الخريف و بداية الربيع.. و طبعا مفهوم ان في الصيف استحالة حد عاقل يمشي بسبب حرارة الجو و الرطوبة العالية.. بس المؤسف انه لا يوجد تند .. يمكن موجود بس قليل.
و المشي في شوارع قطر و خاصة على كورنيشها يعتبر متعة كبيرة و فرصة للاسترخاء و استعادة الطاقة و عمل سباحة فكرية و استجمام نفسي..
* اما في مصر فجربي تمشي على الكورنيش و تطلقي بصرط في السماء . . جميل كورنيش النيل .. لكن لازم تشوفي السحابة السودءا.. فتضطري للنظر تحت.. فتصطدمي ببصاق و مخاط و روث لحيوانات وبني أدمين.

* إذا مشيتي على كورنيش قطر فلن تصادفي غير الأدميين..
على كورنيش مصر.. وارد يصادفك إنس و جن و مشعوذين.. و قطط و كلاب بلدي على كورنيش الوراق.. و قطط سيامي و رومي و شيذار وكلاب أرمنت و لولو وولف و سلوقي و البول دوج على كورنيش المعادي.. و طبعاً تصادفي حمير و حصنة و حشرات و ذواحف و جمال في مختلف الشوارع.
*حاولي تستريحي على أريكة خشبية على كورنيش النيل.. أراهنك ستجديها محطمة أو مكتوب عليها .. أو تفاجئي ان ملابسك قد اتسخت بسبب ناس ماسحة كل قذارتها في الأريكة أو تجدي ملابسك قد تقطعت بسبب المسامير البارزة من الأريكة.. فتقرري استكمال المشي لتجدي عشرات الاشياء التي تعكنن نزهتك او تريضك، من حفر و مأبات ومطبات وبالوعات على الرصيف، و محاولات معاكسة تبدأ بكلمة و قد تنتهي بمحاولة تحرش.. ناهيك عن المناظرالمذرية لشباب يحب على الكورنيش– و هذه المناظر موجودة في كل الأوقات.. يعني لا وقت شغل بيمنع ولا مواعيد مدرسة تكون عائق .. و لا حتى بيستحوا في رمضان او ذو الحجة!

* اقدرأقل لك أن موضوع المعاكسات مقيد جداً في قطر.. احياناُ يحاول شخص رمي رقم جواله .. فإذا تمكنت السيدة من التقاط رقم سيارته أو بعض أرقام هاتفه تستطيع الإبلاغ عنه..لأن القانون رادع بخصوص موضوع المعاكسات.. فلو قطري بيتم رفده من عمله بفضيحة.. و لو مقيم.. يرحل في نفس اليوم على بلده.. فالناس ماشيية بأدبها في الشارع.

*طبعا مش محتاجة اقلك ان ما فيش مطبات على الكورنيش .. لان دي عملية بديهية.. – لكن للاسف في حفر و مطبات في الشوارع الداخلية خاصة لو في تصليحات- بس ما تلاقيشالرصيف مكسر او متضعضر و لا تلاقي واحد فاتح غرزة على الكورنيش تحت ستار انه يبيع بيبسي أو حاجة صاقعة أو ترمس و ذرة مشوي.. فقط مسموح للصيادين ببيع السمك في منطقة واحدة على الكورنيش من الساعة السابعة صباحا و حتى الواحدة ظهراو من الساعة الرابعة عصراً و حتى منتصف الليل.

*و ما فيش مناظر مؤذية لواحد وواحدة ماشيين مربطين في بعض على الكورنيش .. و لا واحد مدي وشه للكورنيش و ظهره للشارع و بيسمد !! الحاجات دي مش موجودة .. طبعا قطر و الخليج كله مش المدينة الفاضلة.. أكيد فيها سلبيات و شايفينها .. بس إذا وجدت أخطاء .. فلا ييتم التستر عليها أو التجاوز عنها.

* فيروز بتقول على النيل" كتب على أرضه قصص باللحب تلتهب" ده صحيح لكن كورنيش قطر ما بيتكتبش عليه غير أرقام الكيلومترات و الاشارات الخاصة بالمرور و المشاه.. و العلامات الخاصة بالتحذير من صناديق الكهراباء أو العلامات التي تمنع الصيد او التحذير من رمي القمامة.
* في مصر تجدي السيارات مكتوب عليها " درر"
العين صابتني و رب العرش نجاني
غدارين
يقيني بالله يقيني
يا بركة دعاكي يا امة
للبيع عشان ترتاحو

* لم ارى في دولة خليجية عبارات سوى" كلنا قطر " او علامة " كيدز اون بورد" يعني علامة تدلل على وجود اطفال.. لكن كثيرا ما نرى صور للأميرعلى ظهر السيارات.

* بصى تجاوزات الإشارة و عدم لبس حزام الأمان .. ليست في القاموس القطري.. و رغم ذلك الحوادث عندهم مميتة لأن مشكلتهم السرعة الجنونية.. و موضوع السرعة ده مصيبة في كثير من دول الخليج خاصة في الامارات و البحرين و قطر.. و المخالفات دول مجلس التعاون غالية للغاية من أجل الردع..

* اطبعاً أنت عارفة ان الإشارات في مصر معمولة على سبيل التنفيس علشان الناس تكسرها وتشعر انها انتقمت من الحكومة .. لكن هنا صعب جدا تجدي حد يكسر إشارة ..أو طفل بيخبط على زجاج السيارة او بيرمي لك علبة مناديل وبعدين يشتمك لو لم تشتري منه.

* من النادر أن تجدي ضابط شرطة واقف في اشارة في قطر .. و لكن أحيانا تجديهم بسياراتهم في الدوارات ( الميادين) ينظموا المرور.. اما في مصر فالموضوع مشترك والدنيا تعاون .. و تلاقي واحد نازل من سيارته او راكن عجلته وواقف ينظم المرور مع العسكري!
* المشترك بقه في شوارع قطر و مصر .. ان ممكن تمشي في البلدين في شوارع لها اسماء صعب تعرفي بتاعت مين" ام غويلنا و رأس أبو عبود و مشيرب في قطر . و في مصر شارع نوال و ميدان لاظوغلي.

*الاحتفال بفوز الأهلى او المنتخب ي مصر أجباري و كمان الإحتفال بفوز العنابي في قطر واجب وطني على قائدي المركبات.
* الحوادث في البلدين كثيرة .. لكن في قطر أشنع.. و غالباً بسبب السرعة
* الشباب في البلدين بيسوقوا قبل ما يستخرجوا رخصة
أولاد المحظوظة!
* غريبة ان كورنيش مصر بيستخدم لعمل الزفات و ألأفراح.. و كورنيش قطر يستخدموه لعمل يوم رياضي لتشجيع العائلات على القيام بالرياضة على نطاق عائلي .. الرجال "مشي و جري" و السيادات مشي فقط .. مع تقديم جوائز للخمسين ألأوائل. . قدر الجائزة الواحدة 2000 ريال قطري( نحو 3500جنيه). و كمان الدولة بتنظم المسيرات اللي الناس بيقوموا بها لمساندة الشعب الفلسطيني احيانا ..او مثلا للاحتجاج على الرسوم الكاروتونية المسيئة للرسول( ص).. و ما فيش لا زعيق و لا سباب و لا قلة أدب.. ناس ماشية بهدوء و كمان واخدين اطفالهم على " البوسات" في المسيرات.. عرفتي مين بقه الشعب اللي اولاد محظوظة!

* غريبة انك لو ماشية في كورنيش مصر بتبقي عاملة حسابك انك ممكن "تتشإطي" تتسرقي يعني.. لكن كورنيش قطر أمان جداً.. تخيلي مرة وقعت مني سلسلة المفاتيح الذهب - وفيها مفاتيح السيارة والبيت و صندوق البريد-و أنا باتمشى الصبح على الكورنيش.. طبعا رجعت ابحث عنها وأنا مش عارفة وقعت في أي منطقة.. المهم رجعت بخفي حنين و انا أبكي.. ثاني يوم قلت أحاول تاني..و انا اصلا كده كده هاتمشى.. تخيلي لقيتها.. طبعا كله بفضل الله و طبعا كانت مامي وانا و ياسر بندعي ربنا.. بس يعني سبحان الله مخي مش قادر يستوعب ان في حد يشوف سلسلة مفاتيح ذهب مرمية في الشارع و يتركها! و كمان غريبة جداً ان اجد ها ثاني يوم. ماجدة اوعي تفتكري اني باسرح بك.

مرة اخرى نسيت محفظتي في تاكسي.. و لم يكن بها البيزنس كارد الخاص بي.. فقط البطاقة و فلوس و بيزنس كارد الخاص ببعض الزملاء الصحفيين.. فقام سائق التاكسي بالاتصال باحد أصحاب هذه الكروت والذي اعطاه بدوره رقم الجريدة التي أعمل بها .. ثم قام السائق بالاتصال بي.. فذهب ياسر لمقابلته.. و تسلم منه المحفظة بعد أن تأكد انه زوجي.
* مرة أخرى.. ياسر كان راكب تاكسي وراجع البيت..السائق قال له .. هناك سيدة ركبت معي و نسيت نظاراتها.. فشافها ياسر و عرف انها تخصني.

* غريبة انك تلاقي في مصر مراكبية مسعرين النزهة النيلية بخمسين جنيه لمدة نصف ساعة للمصريين و ب300 جنيه للأجانب.. و في "خور دبي" أي انسان .. بصرف النظر عن ملته أو جنسيته- يقدر يركب المراكب " البتيل " بنصف ريال" للفرد..
*على فكرة المراكبي من دول بيبقى مبسوط جداً انه عرف يستغل السياح عرب كانوا أو أجانب.. و يشعر بنشوة كونه بذكائه و ألمعيته عرف يسرق الكحل من العين و يلبسهم العمة" و بعدين لو عنده ضمير، فهو مستريح جداً.. لانه بيتعامل مع الأجانب و خصوصا الخليجيين، و دول في شرعه.. ناس واكلينها والعة.. و كرشهم مليان . . ولقينها بالساهل.. فحلال نعِب منهم.. و المليان.. يكب على الفاضي.. مش كده و لاايه؟!
تفتكري يا ماجدة.. هتفرق مع المراكبية دول لو عرفوا أن السياح العرب بيكونوا عارفين ان المراكبي من دول بيغلي عليهم الأسعار و بيسرقهم و مع ذلك بيعطوه الفلوس كنوع من الاحسان لانه غلبان.. تبقى مصيبة لو ما تفرقش معاهم.. ناقصين احنا يبقى عندنا ازمة كرامة..


رجالة و طول عمر ولادك يا بلدنا رجالة

* معروف ان كورنيش الخليج بيمارس فيه رياضة المشي و التنزه فقط.. اما كورنيش مصر فيمارس فيه كافة انواع الرذائل" أهونها السباب بالأب والأم والشتائم لكل أعضاء جسم الإنسان والمعاكسات بالكلام والنظرات البجحة .. و أنت طالعة بقه .. نصب و اغتصاب و سرقة و خناقات بمطاوي و قرن غزال و تسمعي طول ما أنت ماشية - لو من سيدات- ردح و تشليق و لو من ذكور أيمان طلاق و لعن للأديان و للبلد بالي جابوها – أستغفر الله العظيم- و مع ذلك الناس مصممين يتكلموا عن شهامة الإنسان المصري اللي ما بتطلعش غير في المواقف الصعبة و المصايب .. لان المصري معدنه أصيل ما بينورش غير في الظلام..و لازم كلنا نغني" رجالة و طول عمر ولادك يا بلدنا رجالة .. و غلاوتك يا بلدنا و الله مش محتاجة قوالة".

يا ماجدة.. انا مش محتاجة اقلك اني انا و غيري من المغتربين لسنا اقل وطنية من دكتور جمال حمدان و من أي انسان بن مصر .. و اعتقد لا مجال للمزايدة لعى وطنية أي مصري.. يمكن نقدي لاذع.. لكن نفسي ممررة جداًُ يا ماجدة.. و مش أنا اللي تقصد تسيء لبلدها.. لكن من يسيئ للبلد؟ أنا لست قادرة على التحديد.

أنت عارفة..الاعلان بتاع" البيت بيتك" اللي يذاع لتشجيع السياحة في مصر .. اللي تجدي فيه عامل في فندق بيفتح ذراعه علامة ترحيبه بالضيوف و بيقول: البيت بيتك .. و المشهد الثاني راقصة شبه عارية منظرها مقذذ.. و الاعلان بيقول: اتفضل البيت بيتك وعندنا راقصات.
واحدة صحبتي مصرية و تعيش معي هنا في قطر .. قالتلي ان في واحد زميل زوجها راح يسأله في الشغل عن عنوان الراقصة دي او أين ترقص..على أساس أن احنا في مصر بنشجع السياحة.. و لا تتخيلي مدى الحرج اللي تحمله هذا الرجل .. المهم قاله: الراقصة دي شهيرة جدا.. فقط أنت تنزل مصر و تروح منطقة اسمها الزاويا الحمرا و تسأل عن الراقصة دي و هما يدلوك عليها.
المهم الراجل عمل بالنصيحة و راح .. ما رجعش. طبعا اخد علقة سخنة .. يستاهل!
خريطة لمطبات مصر.. اوعى الفحت لتقع تحت

* و أحد غرائب شوارع مصر ان المطبات فيها ..كأهراماتها.. مطبات تاريخية .. خالدة.. لاتؤثر فيها السنين.. يسافر المسافر و يهاجر المهاجر و يعيش المناضل .. و تبنى السدود و تهدم البيوت.. و هي كما هي ثابتة في الأرض لا تتزعز.. قاعدة على قلبنا ..زي اليهود ما هم لابدين على ارضنا.
المطبات في مصر غير.. المطبات في مصر معلم و مزار.. و للسلامة من كل مطب وحفرة او نقرة أو ربما دحديرة.. خدي عندك:

دليل السلامة من مطبات القاهرة حسب المناطق

مدينة نصر وصلاح سالم
مطب تحت كوبرى الفنجرى فى شارع صلاح سالم باتجاه القادم من العباسية الى مصر الجديدة.

طريق كورنيش المعادى
منزل كوبرى الملك الصالح باتجاة القادم من وسط البلد متجها للمعادى :عبارة عن اربع مطبات تم تصميمهم بطريقه "عوئر"فإذا حاولتي مفادة الأول لاحقك الثانى والثالث فتقع فى الرابع لا محاله.. هذا طبعا لو كان الطريق فاضى وسمح لك الوقت والسرعة بالمناورة..عادة بتاخديهم الأربعة وانتي ساكتة وراضية وبتبوسي ايدك وش وضهر.

طريق حلوان الزراعى الموازى لكورنيش المعادى:
مطب مشهور عند سوبر ماركت مترو و عند معظم التقاطعات.

طريق الهرم - 6 اكتوبر
عند فتحة مدينة 6 اكتوبر باتجاة العودة الى القاهرة وخصوصا فى الليل هذا يعتبر مطب نميس للغاية وموضوع بزاويه حادة جهة الطريق اليسرى لأصطياد الراغبين فى العودة الى القاهرة على اعتبار ان العاصمة مش ناقصه بشر اكثر من كدة.. وشكر خاص لجمعيات تنظيم الأسرة.

مطبات طريق الفيوم - الهرم
عند مرتفعات هضبة الأهرام ونادى الرماية..عبارة عن مطبات صناعية على طريقه جبال الهيملايا مخصصه لأصطياد السيارات المسرعة والمتوسطة السرعة والبطيئة.. هذه المطبات – غالبا- كانت تستخدم لوقف الزحف الألمانى فى الحرب العالمية الثانية.

مطبات شارع القصر العينى
باتجاة القادم الى وسط البلد وخصوصا فى الحارة اليسرى من الطريق ناحية محل تسيباس الحلوانى.. عبارة عن أربع خنادق فى الأرض تصلح لتخبئة قناصة محترفين لصد العدوان على مجلس الشعب اللى موجود فى نفس الشارع.. تم وضع المطبات بطريقة سادية تمنعك من تلافى الوقوع فيهم نهائيا.. يعني ما فيش بن جنية يعرف يفلفص منها.

و ممكن تنظيم مسابقة لمن يستطيع تجاوز هذة المطبات والجائزة مقدمة من هيئة الطرق والكبارى عبارة عن طقم مساعدين و عفشة للفائز الأول.
و طبعا مطبات العتبة و الحسين و شارع الجيش دول تراث.. و الدولة تحارب من يحاول تغيير معالم الدولة .
و انت عارفة المطبات في مصر من النوع العميق المتأصل في التربة المصرية.. و لو واحد غريب عن البلد و ماشي مش واخد خوانة وعينه مش في وسط راسه .. تقدري تقولي ان الله يعوض عليه في الشكمان بتاعه و المساعدين.. و الكاويتش والعربية كلها.
ملحوظة : معظم سائقى السيارات من المؤمنين بالله ورسوله يعتقدون ان المطبات في مصر نوع من تكفير الذنوب أو زيادة الحسنات.. فشكرا لمحافظة القاهرة الكبرى!

في مصر شحاتيين .. مافيش متسوليين
* في عهد الرخاء الي احنا عايشيين فيه اليومين دول .. يعتبر الشحاتين أحد معالم شوارع مصر المحروسة" هو" الشحاتيين" .. مش عارفة ليه مش قادرة اطلق عليهم "متسولين" حاسة ان كلمة متسوليين فيها مسحة إحترام .. هم ليسوا أهلاً لها..
و طبعا الشحاتة في مصر أصبحت فن و مهنة و مهارة و تجارة ارباحها مضمونة .. فعلا مافيا ..
عارفة يا ماجدة:
مرة كنت في مؤتمر صحفي في شيراتون الدوحة و قابلت فيه صحفية .. عرفت اني مصرية .. فأخبرتني انها لسة راجعة من أجازة أمضتها في مصر.. هي البنت فلسطينية .. و بتحب مصر جدا.. وحكت لي انها نزلت مع عائلتها في شقة في المهندسين..هي قالت المهندسين من هنا .. أنا سخنت .. و قعدت اقول في نفسي : يا رب ما تشتكيش من الشحاتين بتوع شارع جامعة الدول العربية.. دول عصابات يا ماجدة.. بس اللي حسبته لقيته..
قالت: انت عارفة يا داليا القاهرة فيها مناطق روعة.. بس المتسولين خوفوني جدا.. و قعدت تحكي على شحات مشوه رقبته و جزء من وجهه فضل ماشي وراها و يقللها: هاتي 10جنيه!

بتقول: انا كنت عايزة اعطيه 20 .. لكن مش قادرة أطلًع فيه.. يعني مأروفة من منظره مش قادرة تواجهه.. فقالت لأختها خدي الفلوس اديهاله.. و هما مرعوبين من منظره..
قلت لها: عارفة الباقي ما تكمليش.. طبعاً راميتله المصاري على رأيها ولمها .. هي مش بترميها علشان تزله لما يوطي و يلمها .. لو كان في كلامها ريحة قلة أدب.. كنت هاعرف و أرد عليها أخرسها.. بس هي رمتها قرفا من منظره!! حاجة تكسف.. و البنت عمالة تشكرلي في جمال مصر و حبها لشعب مصر الطيب .. الجميل. . بس اللي يكسف اكثر انهم فاكرين ان احد أسباب انتشار المتسوليين في مصر بهذه الصورة هو ان المتسوليين بيقاسموا مع ضباط الشرطة ليسمحوا لهم بالتمركز في مناطق بعينها.. تخيلي !!
متفقين احنا يا ماجدة ان قطر مش المدينة الفاضلة .. و لا اي دولة غير قطر.. و على فكرة في تسول في قطر بدأ يظهر على استحياء في المجتمع القطري.. بس بصراحة منذ اقامتي في قطر من سنوات و حتى الأن لم ارى متسولة غير مرتين .. و الباقي سماع.. لأن الفقر في قطر يسمح بالتعفف أما الفقر في مصر فقبيح مزل و لا يسمح للناس سوى بالتوحش!
و من أغرب وسائل التسول التي سمعت عنها في قطر .. طريقة غريبة نشروا عنها في جريدة الشرق القطرية" بتتلخص في ان واحد يرن على الموبايل و يقفل الخط .. ولأن المكاملة دولية فيدفعك الفضول لان تعرفي من المتصل .. فتقومي بمعاودة الاتصال بالرقم المتصل .. فتجدي واحدة تخبرك بمدى حبها لقطر ورغبتها في زيارتها لانها سامعة عن اهلها الطيبين.. وانها ولهانة على قطر و بدها تيجي على قطر لتتاكد من صحة و حقيقة طيبة اهلها .. و تطلب هذه المتسولة من صاحب الرقم ان يرسل لها حوالة بالدولار كي تتمكن من حجز التذكرة!
مش قصة اللي باحكيه ده.. فعلا جريدة "الشرق" نشرت تحذير من هذا الأسلوب المبتكرفي التسول لانه بدا ينتشر.
مرة أخرى .. شاهدت رجل مسن .. جاء لمقر الجريدة حيث كنت أعمل و طلب من مدير القسم مساعدة.. لكن في الغالب .. هناك عدد من الجمعيات الخيرية في قطر تقوم برعاية " الأسر المتعففة" يعني هم يبحثون عن الأسر المتعففة لتوفير طلباتهم في السر منعاً لإحراجهم.

و هناك فكرة مبتكرة تتعلق بالأطفال القصر.. فايتام الرجل المتوفي تديرها هيئة لا تكتفي بحفظ مال القصر.. بل تستثمره لهم في البورصة والمشروعات التجارية لتنمية اموالهم منعا لاهدار اموالهم.. كما أنهم يقومون بتعليم هؤلاء الأبناء كيفية المضاربة في البورصة بالاضافة لاشراكهم في دورات تدريبية خاصة بالادارة لتعليمهم كيفية ادارة اموالهم لاحقا.. على فكرة هذا الكلام قد تم تنفيذه بالفعل .. و ليس مجردانشاء.
دول القطريين هما اللي اولاد المحظوظة حتى لو ايتام .. مش احنا.. اللهم لا حسد.
اه قبل ما انسى هاختم بنص جميل لفاروق جويدة اسمه" ماذا أصابك يا وطن " بيحكي عن رجل مصري فقير اسمه عم فرج .. ضاقت به الحال في مصر فسافر يعمل في الخليج .. و لما عاد في زيارة .. بخلوا عليه بقبر .. فدفن في البحر.
ماجدة .. أرجوكي خللي بالك من نفسك و تأكدي إني صحيح في قارة أخرى .. لكن قلبي معك جدا ..و أرجوكي ترسلي لي صور لنور و عبد الرحمن لأني إشتقت لهم كتير.. و لو عندك كونتكت لحد من زمايلنا .. ارسليه و سلامي لانكل يسري و تانت تونيا و داليا و أمري و عائلته.
سلام و في رعاية الله


أنـا من سنين لـم أره
لـكن شيئا ظـل في قـلـبي زمانا يذكـره‏..‏

عمي فرج‏..‏
رجل بسيط الحال
لم يعرف من الأيام شـيئا
غير صمت المتـعبـين
كنـا إذا اشـتدت ريـاح الشك
بين يديه نـلتمس اليقين‏.
كـنا إذا غـابت خـيوط الشـمس عن عينـيه
شـيء في جوانحنـا يضل‏..‏ ويستكين

كنـا إذا حامت علي الأيام أسراب
من اليأس الجسور نـراه كـنز الحالمين‏..‏

عمي فـرج‏..‏
يوما تقلـب فـوق ظـهر الحزن
أخـرج صفحة صفراء إعلانا بـطـول الأرض
يطلب في بـلاد النـفـط بعض العاملين

همس الحزين وقـال في ألم‏:‏
أسافر‏..‏ كـيف يا الله
أحتمل البعاد عن البنية‏..‏ والبنين ؟‏!..‏
لم لا أحج‏..‏ فـهل أموت ولا أري
خير البرية أجمعين‏..‏
لم لا أسافر‏..‏ كلـها أوطـانـنـا‏..‏
ولأنـنـا في الهم شـرق‏..‏ بيننا نسب ودين‏.‏
لـكنه وطـني الـذي أدمي فـؤادي من سنين

ما عاد يذكرني‏..‏ نـساني‏..‏
كـل شيء فيك يامصر الحبـيبة
سوف يـنسي بعد حين‏..‏
أنا لـست أول عاشق نـسيته هذي الأرض
كم نـسيت ألوف العاشقين‏..‏

عمي فرج‏..‏
قـد حان ميعاد الرجوع إلي الوطـن
الكـل يصرخ فـوق أضواء السفينة
كـلـما اقـتـربت خيوط الضوءعاودنا الشـجن
أهواك يا وطني‏..‏
فلا الأحزان أنـستني هواك ولا الزمن

عمي فرج‏..‏
وضع القميص علي يديه
وصاح‏:‏ يا أحباب لا تتعجبوا
إني أشم عبير ماء النـيل فوق الباخره
هيا احملـوا عيني علي كفي
أكاد الآن ألمح كل مئذنة

تطـوف علي رحاب القاهره‏..‏
هيا احملوني

كـي أري وجه الوطـن‏..‏
دوت وراء الأفق فرقـعة
أطاحت بالقـلوب المستـكينه
والماء يفتـح ألف باب
والظـلام يدق أرجاء السفينه
غاصت جموع العائدين تناثـرت
في الليل صيحات حزينه

عمي فرج‏..‏
قـد قام يصرخ تـحت أشـلاء السـفينه
رجل عجوز
في خريف العمر من منكم يعينه
رجل عجوز آه يا وطني
أمد يدي نحوك ثم يقطعها الظـلام
وأظل أصرخ فيك‏:‏ أنقذنا‏..‏ حرام

وتسابق الموت الجبان‏..‏
واسودت الدنيا وقـام الموت
يروي قصة البسطاء

في زمن التـخاذل والتنـطـع والهوان‏..‏
وسحابة الموت الكـئيب
تـلف أرجاء المكـان

عمي فرج‏..‏
بين الضحايا كان يغمض عينـه
والموج يحفر قبره بين الشـعاب‏.‏
وعلي يديه تـطل مسبحة ويهمس في عتاب
الآن يا وطـني أعود إليك

تـوصد في عيوني كل باب
لم ضقـت يا وطني بـنـا
قد كـان حلـمي أن يزول الهم عني‏..‏ عند بابـك
قد كان حلمي أن أري قبري علي أعتابـك
الملح كفـني وكان الموج أرحم من عذابـك

ورجعت كـي أرتاح يوما في رحابك
وبخلت يا وطني بقبر يحتويني في ترابك
فبخلت يوما بالسكن
والآن تبخـل بالكفـن

ماذا أصابك يا وطـن؟
‏(فاروق جويدة)
داليا الحديدي
الدوحة– قطر
26-1-2007


=======================================================================================